Mámleketimiz boylap ámelge asırılıp atırǵan “Jasıl mákan” ulıwma milliy joybarınıń kóklemzarlastırıw baslaması tábiyǵıy resurslardı qásterlep saqlaw hám ekologiyalıq hár túrlilikti támiyinlewge qaratılǵan bolıp, bul baǵdarda Ámiwdárya rayonında nátiyjeli jumıslar alıp barılmaqta.

Qorshaǵan ortalıqtı qorǵaw ushın “jasıl belbewler”diń jaratılıwı Aralboyı regionına ekologiyalıq turaqlılıqtıń qosımsha rezervin hám qala aglomeraciyalarınıń qorshaǵan ortalıqqa tásirin azaytıw imkaniyatın beredi. Ózbekstan Respublikası Ekologiya, qorshaǵan ortalıqtı qorǵaw hám klimat ózgeriwi ministrligi, BMSh Rawajlanıw baǵdarlaması hám Global ekologiyalıq fondtıń “Aral teńizi basseyni landshaftınıń turaqlı hám degradaciyaǵa biytárep, turaqlı turmıs tárizin qollap-quwatlawshı tiykarı sıpatında kóller, suw-batpaqlıq jerler hám jaǵalıq boyı jolların saqlaw hám basqarıw” (Aral Sea Wetlands) birgeliktegi joybarı da “Jasıl mákan” ulıwma milliy joybarınıń kóklemzarlastırıw baslamasın ámelge asırıwǵa óziniń múnásip úlesin qospaqta.
Usı joybarlar sheńberinde ámelge asırılıp atırǵan jumıslardıń jaǵdayın úyreniw maqsetinde respublika juwapkerlerinen ibarat jumısshı topar Ámiwdárya rayonında boldı hám rayonda jaylasqan “Qıpshaq” toǵay xojalıǵı menen “Tómengi Ámiwdárya” mámleketlik biosfera rezervatına 3 mıń 400 túp mádeniy hám miyweli terek náli tapsırıldı. Bul Aralboyı regionında baǵ hám tereklikler maydanın keńeytiw imkaniyatın jaratadı.
Miyweli terekler jergilikli xalıq wákillerine qosımsha dáramat dáregin jaratıw hám aymaq faunası wákilleri, sonıń ishinde, kóship júriwshi haywanlar hám quslar ushın azıqlıq bazasın keńeytiw imkaniyatın jaratadı. Jer resursların turaqlı basqarıw usılları, atap aytqanda, toǵaylardı kóbeytiw, topıraq qatlamınıń buzılıwınıń unamsız aqıbetlerin saplastırıw hám sol arqalı LDN (jer degradaciyasın neytrallastırıw) ǵa erisiwge járdem beredi.
Bul ilaj Aral teńizi suw basseynleri joybarınıń shólleniwge qarsı gúresiw, landshaftlardı qayta tiklew hám tábiyǵıy resurslardı turaqlı basqarıw mashqalaların sheshiwge bolǵan kompleksli qatnasın sáwlelendiredi.

Qaraqalpaqstan xabar agentligi