Nókis qalasında Sudyalar joqarǵı keńesiniń baslıǵı Xolmwmin Yodgorov Qaraqalpaqstan Respublikası sudları sudyaları menen olardıń shańaraq aǵzalarınıń qatnasıwında ashıq sáwbetlesiw ótkerdi.

Ilaj sudyalardıń lawazımı wákilliginen ǵárezli maqsetlerde paydalanıwınıń ayanıshlı aqıbetlerin ózinde sáwlelendirgen videofilmniń kórsetiliwi menen baslandı.
Sistemanıń tiyisli jazanı ótep atırǵan burınǵı wákilleriniń ókinishleri sudyalar hám olardıń shańaraq aǵzaları ushın da ózine tán sabaq wazıypasın atqaradı.
Sudyanıń shaxsı, onıń ádep-ikramlılıǵı hám turmıs tárizi tek ǵana huqıqıy qararlardı qabıl etiw procesinde emes, al jámiyette ádillikke bolǵan isenimdi qáliplestiriwde de áhmiyetli orın iyeleydi. Ilajda sudyalar hám olardıń shańaraq aǵzalarınıń qatnasıwında lawazım wákilliginen paydalanıwdıń awır aqıbetlerin sáwlelendiriwshi videofilmniń kórsetiliwi buǵan ayqın mısal bolıp esaplanadı.
Bul ilajdıń dıqqatqa ılayıqlı tárepi – jazasın ótep atırǵan burınǵı sudyalardıń islegen qılmısınan shın kewilden pushayman bolıp aytqan ókinish sózleri búgingi sudyalarǵa ózine tán sabaq beriwge urınıw boldı.
Ushırasıwda mámleketimizde basqıshpa-basqısh dawam etip atırǵan sud-huqıq reformaları procesinde sud hákimiyatınıń abırayın arttırıw hám sudyalardıń haqıyqıy biyǵárezligin támiyinlep, olardı sociallıq qorǵawǵa ayrıqsha itibar qaratılıp atırǵanı da atap ótildi. Sudyalardıń minnetlemeleri hám Sudyalar ádep-ikramlılıq kodeksine ámel etiliwinde mamanlıq kollegiyalarınıń jumıs nátiyjeliligin bunnan bılay da arttırıp, qosımsha ilajlar kóriw zárúrligi haqqında sóz etildi.
Sońǵı jılları sud sisteması, sudyalardıń erkinligin támiyinlew hám olardı sociallıq qorǵawǵa qaratılıp atırǵan itibar sudyalarǵa úlken juwapkershilik júkleytuǵını atap ótildi. Bunday juwapkershilik sudyadan isenimlilik, antqa sadıqlıq hám hadallıqtı talap etedi.
Sonday-aq, ashıqtan-ashıq sáwbetlesiw barısında intizamsızlıqqa jol qoymaw, adamlardı sergizdan etpew, islerdi kóriwde processual múddetlerge ámel etip, óz waqtında nızamlı kórip shıǵıwı hám sudyalar ádep-ikramlılıq kodeksi talaplarına qatań ámel etiwi atap ótildi. Hár bir istiń negizinde insan táǵdiri, huqıqı jatqanı bárqulla itibarda bolıwı shárt ekenligi, sud hákimiyatınıń biyǵárezligi, sudyalardıń qol qatılmaslıǵın támiyinlew, olardıń ádil sudlawǵa baylanıslı jumısına hár qıylı aralasıwlardıń aldın alıw, sistemada korrupciyaǵa qatań mawasasızlıq ortalıǵın jáne de arttırıw, tarawdaǵı mashqalalar hám olardıń sheshimleri haqqında pikir alıstı.

Qaraqalpaqstan xabar agentligi.