Óz isbilermenligin baslaw tilegindegi «Hayal-qızlar dápteri»ne kirgizilgen hayal-qızlardıń joybarların qollap-quwatlaw hám járdem kórsetiwde máhálle jetiligi ayrıqsha orın iyeleydi.

Beruniy rayonı Bostan máhállesi turǵını A.Bekieva jeńilletilgen kreditten paydalanıp, qıytaq jerinde ıssıxana jumısı menen shuǵıllanıp atır. Usı isbilermenligi arqasında 4 perzentin joqarı oqıw ornında oqıtıp atır. Bunıń barlıǵı hadal miynettiń nátiyjesi ekenin atap ótti.
Usı máhálledegi 300 den aslam shańaraqlar respublikamız boylap ovoщ hám palız eginleriniń nállerin jetistiriw menen shuǵıllanadı.
– Jas shańaraqlarǵa berilip atırǵan itibar sebepli, Jaslıq mákan puqaralar jıyınındaǵı hayal-qızlar da mámleketimiz tárepinen berilip atırǵan imkaniyatlardan únemli paydalanıp kelmekte. Úy sharayatında kórpe, kórpeshe, túrli pishimdegi kópshikler tigip xalqımızdıń jaqsı kúnlerinde xızmet etiwdi jolǵa qoyǵan, – deydi Beruniy rayonı hákimligi Málimleme xızmeti bólimi baslıǵı A.Urazova.
Sonday-aq, Shabbaz mákan puqaralar jıyınında jasawshı U.Niyetullaeva jeńilletilgen kredit alıp, nan cexın iske qosqan. Buyırtpa tiykarında nan hám pátir pisirip, ishki bazarda satıwdı baslaǵan.
– Prezidentimiz tárepinen baǵıwshısı joq, jalǵız baslı analarǵa jaratılıp atırǵan imkaniyat hám jeńillikler ushın minnetdarshılıq bildiremen, keleshekte jumısımdı jáne de keńeytiwdi rejelestirip atırman, – deydi U.Nieytullaeva.
Jaratılǵan usınday imkaniyatlardan nátiyjeli paydalanıp atırǵan hayal-qızlar búgin kópshilikti quraydı.

Qaraqalpaqstan xabar agentligi