Xorezm wálayatında futbol boyınsha «Universiada» sport jarısınıń respublikalıq basqıshı bolıp ótpekte.

Bul jarısqa mámleketimizdiń barlıq aymaqlarınan 14 komanda 4 toparǵa bólinip, kelesi basqısh jollaması ushın óz-ara gúres júrgizbekte.

Sonıń ishinde, Rustam Xaydarov basshılıǵındaǵı Qaraqalpaqstan saylandı komandası 10-aprel kúni «V» toparındaǵı dáslepki turda Ándijan wálayatı komandasın 3:0 esabında jeńip shıqqan bolsa, ekinshi juplıqta namanganlı jaslar samarqandlı futbolshılardı 1:0 esabında jeńiwge miyasar boldı.
Búgin jarıstıń 2-tur oyınları ótkerilip, onda respublikamız futbolshıları Samarqand wálayatı komandasına 3:2 esabında jeńilip qaldı. Al, Ándijan wálayatı komandası Namangandı 1:0 esabında jeńiwge eristi.
Solay etip, ótkerilgen eki turdan soń Qaraqalpaqstan saylandı komandası dárwazalarǵa kirgizilgen gollar esabınan óz toparında birinshi orındı iyelep tur.
«Universiada» sport jarısınıń 3-tur oyınları erteń 12-aprel kúni ótkerilip, onda respublikamız komandası namanganlı jaslar menen kelesi basqısh jollaması ushın óz-ara bellesedi.

Adilbay Orazov,
Qaraqalpaqstan xabar agentligi sholıwshısı.