Elimiz boylap hár jılı ótkeriliwi dástúrge aylanǵan, 15 qalada bir waqıttıń ózinde start berilip baslanatuǵın ǵalabalıq juwırıw (marafon) ilajları bıyıl da may ayında shólkemleskenlik penen ótkeriliwi rejelestirilmekte.

Bul ilajdıń áhmiyeti joqarı bolıp, Ózbekstan Jeńil atletika federaciyası tárepinen shólkemlestirilip, barlıq tiyisli ministrlikler hám jámiyetlik shólkemler bul ilajǵa qamtıp alınadı.
Ilajdı ótkeriwden baslı maqset – xalıq arasında salamat turmıs tárizi principlerin keńnen en jaydırıw, adamlardı bir maqset átirapında birlestiriw, jıldan-jılǵa ǵalaba en jayıp atırǵan salamatlıq ilajlarınıń dárejesin joqarılatıw bolıp esaplanadı.
Belgilengen aralıqtı qamtıp alǵan marafonda ministrlikler hám mákemelerdiń basshıları, nuranıylar, student-jaslar, imkaniyatı sheklengen sportqa qumar ıqtıyarlılar, jámlespegen jaslar hám basqa da bir qatar adamlar qatnasadı.
Jarıs juwmaǵı boyınsha jeńimpazlar múnásip sıylıqlanadı.
Ózbekstan Jeńil atletika federaciyasında Ministrler Kabinetiniń 2024-jıl 26-dekabrdegi májilis protokolı, usı jıl 3-apreldegi arnawlı tapsırması, sonday-aq, Ózbekstan Respublikası Prezidenti janındaǵı Qáwipsizlik Keńesi tárepinen tastıyıqlanǵan «Ǵalaba juwırıw jarıslarına tayarlıq kóriw hám onı joqarı dárejede ótkeriwge baylanıslı ilajlar boyınsha «jol kartası»nıń orınlanıwın támiyinlew, yaǵnıy bıyılǵı ilajdı ótkeriw máselelelerine baǵıshlanǵan videoselektor májilisi ótkerildi.
Májiliske tiyisli ministrlik, mákeme basshılarınıń sport máseleleri boyınsha orınbasarları (federaciya studiyasınan), Qaraqalpaqstan Respublikası Ministrler Keńesi baslıǵınıń, wálayatlar hám Tashkent qalası hákimlikleriniń sport máseleleri boyınsha orınbasarları, ministrlik, mákemelerdiń orınlardaǵı strukturalarınıń basshıları Bajıxana komitetiniń aymaqlıq basqarmaları studiyalarınan qatnastı.
Májiliste Bajıxana komitetiniń baslıǵı, Ózbekstan Jeńil atletika federaciyasınıń baslıǵı A.Movlonov, Oraylıq Aziya jeńil atletika associaciyasınıń baslıǵı A.Abduvaliev, «FRESH-MEDIA» dóretiwshilik agentligi rejissyorı A.Ayrapetova hám basqalar shıǵıp sóylep, Ózbekstan Respublikası Prezidenti janındaǵı Qáwipsizlik keńesi xatkeri tárepinen Ǵalaba juwırıw jarıslarına tayarlıq kóriw hám olardı joqarı dárejede ótkeriwge baylanıslı ilajlar boyınsha tastıyıqlanǵan «jol kartası»nda belgilengen wazıypalar tuwralı keń túrde maǵlıwmatlar berilip, jarıstı shólkemlestiriw, oǵan ilajı barınsha keń xalıq qatlamın qamtıp alıw, ásirese, jaslardıń bul ilajǵa belsene qatnasıwın, jarıslardıń joqarı dárejede, shókemleskenlik penen qáwipsiz ótiwin shólkemlestiriw, ǵalaba xabar qurallarında keńnen úgit násiyatlanıwın támiyinlew, transport, medicinalıq xızmet hám basqa da máseleler boyınsha tiyisli tapsırmalar berildi.
Ilaj koncepciyası hám baǵdarlaması boyınsha túsinikler berilip, pikir-usınıslar bildirildi.

Á.Jiyemuratov,
Qaraqalpaqstan xabar agentligi