Ámiwdárya rayonınıń Qańlı awılında jaqında ámelge asırılǵan sociallıq joybar – aymaqtaǵı taza ishimlik suwı támiynatı mashqalasına ámeliy sheshim boldı.

Endi awıl xalqı zamanagóy texnologiyalar tiykarında qurılǵan qurılma arqalı jer astı suwların tazalaw imkaniyatına iye boldı. 500 den aslam shańaraqqa xızmet kórsetiwge mólsherlengen bul qurılmanıń paydalanıwǵa tapsırılıwı arqalı tek ǵana xalıqtıń densawlıǵı qorǵalıp qoymastan, al ulıwma sanitariyalıq jaǵday, turmıs sapası hám ekologiyalıq turaqlılıq ta támiyinlenbekte, – dep maǵlıwmat beredi Ámiwdárya rayonı hákimligi málimleme xızmeti bólimi.
Joybar “Tashwell” qurılıs kompaniyası tárepinen biyminnet ámelge asırıldı.
Imarattıń ashılıw máresiminde awıl puqaralar jıyını baslıǵı B.Pirmanov, joybar koordinatorları, nuraniylar, “máhálle jetiligi” hám jergilikli xalıq belsene qatnastı hám qayırlı ilajdı ámelge asırǵan kompaniya basshılıǵına qızǵın minnetdarshılıq bildirip, jumıslarında tabıslar tiledi.
Sonday-aq, joybar sheńberinde aymaqtaǵı mektep oqıwshılarına kórkem ádebiyatlar da sawǵa etildi.

Qaraqalpaqstan xabar agentligi