9-aprel – Qaraqalpaqstan Respublikası Konstituciyası qabıl etilgen kún

Berdaq atındaǵı Qaraqalpaq mámleketlik akademiyalıq muzıkalı teatrında 9-aprel – Qaraqalpaqstan Respublikası Konstituciyası qabıl etilgeniniń 32 jıllıǵına baǵıshlanǵan saltanatlı bayram ilajı bolıp ótti.

Bayram ilajına Joqarǵı Keńes deputatları, ministrlikler, mákeme hám kárxanalardıń, oqıw orınlarınıń, huqıq qorǵaw uyımlarınıń basshıları, student-jaslar, jámiyetlik shólkemlerdiń, ǵalaba xabar qurallarınıń wákilleri qatnastı.
Saltanatlı bayram ilajı Ózbekstan hám Qaraqalpaqstan Respublikaları mámleketlik gimnleriniń atqarılıwı menen baslandı.
Qaraqalpaqstan Respublikası Joqarǵı Keńesiniń Baslıǵı A.Orınbaev jıynalǵanlardı Qaraqalpaqstan Respublikası Konstituciyası qabıl etilgeniniń 32 jıllıǵı menen Joqarǵı Keńes hám Ministrler Keńesi atınan qızǵın qutlıqladı.
Atap ótilgenindey, Konstituciya kóp milletli xalqımızdıń awızbirshiligin hám doslıǵın bekkemlewshi, olardı ullı dѳretiwshilik islerge baslawshı tiykarǵı hújjet esaplanadı.
Qalaberdi, ekonomikamızdıń jıldan-jılǵa bekkemlenip atırǵanı, xalıqtıń sociallıq turmıs sharayatınıń jaqsılanıp baratırǵanı Konstituciyamızdıń tiykarı etip alınǵan, tereń hám puqta oylanǵan iygilikli maqsetlerdiń nátiyjesi bolıp sanaladı.
Prezidentimiz tárepinen bıyılǵı jıldıń «Qorshaǵan ortalıqtı qorǵaw hám “jasıl” ekonomika jılı» dep járiyalanǵanı Aralboyı regionı ushın oǵada áhmiyetli bolıp tabıladı.
Jaqında ǵana Samarqand qalasında bolıp ótken Xalıqaralıq klimat forumında Prezidentimiz keń jámiyetshiliktiń itibarın jáne bir márte Aral apatshılıǵına qaratqanı hám bir qatar baslamalardı alǵa qoyǵanı, sonday-aq, Nókis qalasında ótkerilgen birinshi xalıqaralıq «Aral mádeniyat sammiti»nde Aral teńiziniń ekologiyalıq mashqalası boyınsha xalqımızdıń táǵdiri hám elimizdiń keleshegi menen baylanıslı oǵada áhmiyetli wazıypalar belgilep alınǵanı elimiz turmısındaǵı tariyxıy waqıyalar qatarına kiretuǵınlıǵın atap ótiwimiz kerek.
Prezidentimizdiń tikkeley qollap-quwatlawı nátiyjesinde sońǵı jılları bir qatar xalıqaralıq ilajlar Qaraqalpaqstanda ótkerilip atırǵanı xalqımızdıń bay mádeniyatın, turizm potencialın dúnya jámiyetshiligine tanıtıwda, sırt el investorların regionımızǵa tartıp, óndiris hám qayta islew quwatlılıqların keńeytiwde áhmiyetli bolǵan kóplegen zavod hám kárxanalardı iske túsiriwde, ónimlerdi sırt ellerge eksportqa shıǵarıwda hám jańa jumıs orınların jaratıwda áhmiyetli orın tutpaqta.
Sonday-aq, sońǵı jıllarda qabıl etilip atırǵan tariyxıy párman hám qararlarǵa muwapıq Qaraqalpaqstanda isbilermenlikti jáne de qollap-quwatlaw hám xalqımızdıń abadan turmısın támiyinlew boyınsha burın bolmaǵan kóplegen jańa imkaniyatlardıń jaratılıp atırǵanı, «Joybarlardı ámelge asırıw orayı», Sırtqı grantlar menen islesiw bólimi hám isbilermenlikke kómeklesiw direkciyasınıń ashılǵanı, sonday-aq, sanaattı rawajlandırıw maqsetinde qosımsha jeńilletilgen kreditlerdi ajıratıw názerde tutılǵanı, qalaberdi, 2026-jıldıń juwmaǵına shekem uzınlıǵı 196 kilometrlik «Miskin – Nókis» temir jol liniyasın tolıq elektrlestiriw baǵdarındaǵı jumıslardıń baslanǵanı, Nókis qalasında bahası 78 mln. dollarlıq «Zamanagóy miymanxana hám Kongress-xoll kompleksin qurıw» joybarı ámelge asırılıp atırǵanı xalqımızdı ullı dóretiwshilik islerge ruwxlandırmaqta.
Bulardan tısqarı, bıyılǵı jıldıń aqırına shekem qala hám rayonlarımızda mámleketlik baǵdarlamalar sheńberinde jámi 436 obektte derlik 1 yarım trillion sumlıq qurılıs hám rekonstukciya jumısları alıp barıladı. Sonıń ishinde, 96 awır máhálleniń qıytaq jerleri aǵın suw menen támiyinlenedi. Ishki jollar hám elektr támiynatı tarmaqlarında 319,4 mlrd. sumlıq qurılıs-ońlaw jumısları ámelge asırıladı. Sanaat, xızmet kórsetiw hám awıl xojalıǵı tarawlarında 11 trln. sumlıq 464 investiciyalıq joybar ámelge asırılıp, olar boyınsha 447 mln. dollarǵa teń tikkeley sırt el investiciyaları ózlestiriledi.
Joqarǵı Keńes Baslıǵı jaslarımızdıń erisken nátiyjelerin de maqtanısh penen atap ótti. Atap aytqanda, «Jas kitapqumar» tańlawınıń bıyılǵı máwsiminde Tórtkúlli Wǵiljayron Xaldurdieva óz zamanlasları arasında jeńimpaz bolıp, elektromobil (BYD) menen sıylıqlanǵan bolsa, úmitli sportshılarımızdan Jalǵasbay Berdimuratov Iordaniya mámleketinde sport gúresleri boyınsha ótkerilgen Aziya chempionatında altın medaldı, al, Shaxzada Allaniyazova bronza medalın jeńip alıwǵa eristi.
Saltanatlı bayram ilajında Qaraqalpaqstan xalıq shayırı G.Dáwletova bayramǵa baǵıshlanǵan qosıǵın oqıdı. Ájiniyaz atındaǵı Nókis mámleketlik pedagogikalıq institutı studenti A.Allambergenova ilaj qatnasıwshıların jaslar atınan bayram menen qızǵın qutlıqladı.
Ilaj kórkem óner sheberleri tárepinen tayarlanǵan koncert baǵdarlaması menen dawam etti.
Saltanatlı májiliske Ózbekstan Respublikası Prezidentiniń keńesgóyi T.Xudaybergenov, Qaraqalpaqstan Respublikası Ministrler Keńesiniń Baslıǵı F.Ermanovlar qatnastı.

Qaraqalpaqstan xabar agentligi.