Ózbekstan máhálleri associaicyası baslıǵınıń birinshi orınbasarı Javdadxon Inoǵomov basshılıǵındaǵı Ózbekstan delegaciyasınıń Qırǵız Respublikasına saparı bolıp ótpekte.

Associaciya málimleme xızmetiniń maǵlıwmatına bola, Bishkek qalasındaǵı Qırǵızstan jergilikli ózin-ózi basqarıw awqamında ushırasıw shólkemlestirildi. Ushırasıw aldında atap ótilgenindey, búgingi kúnde Prezidentler Shavkat Mirziyoev hám Sadir Japarovtiń siyasiy erk-ıqrarı, bekkem doslıǵı sebepli mámleketlerimiz birgelikte rawajlanıw jolınan barmaqta.
Javdadxon Inoǵomov Ózbekstannıń ayrıqsha strukturası bolǵan máhálle institutı, Prezidentimizdiń baslaması menen engizilgen «máhálle jetiligi» jumısı boyınsha tolıq maǵlıwmat berdi. Qırǵız Respublikasınıń ekspertleri atap ótkenindey, bul unikal sistema mámlekette jumıssızlıq, migraciya, shańaraqlıq ajırasıwlar, jınayatshılıq kórsetkishleriniń keskin tómenlewine úlken túrtki berdi. Sonıń ushın da usı ámeliyatqa dúnya mámleketleriniń ózin-ózi basqarıw uyımları tárepinen úlken qızıǵıwshılıq bildirilmekte.
Ushırasıwda Qırǵız Respublikasınıń ózin-ózi basqarıw sisteması, mámlekettiń búgingi rawajlanıw tendenciyaları haqqında maǵlıwmat berildi. Keleshekte birgelikte ámelge asırılıwı zárúr bolǵan rejeler belgilep alındı. Sonday-aq, ózbekstanlı taraw juwapkerlerine Qırǵızstan Parlamentiniń búgingi kúndegi jumısı boyınsha maǵlıwmat berildi.
Sapar dawmaında Ózbekstan delegaciyası Qırǵızstannıń bas kitapxanasında boldı.
Qırǵız Respublikası Milliy kitapxanası Oraylıq Aziyadaǵı eń iri kitapxanalardan biri bolıp esaplanadı. Mámlekettiń bas kitapxanası qırǵız xalqınıń mádeniy baylıqları hám dástúrlerin qásterlep saqlaw baǵdarında uzaq jol basıp ótti.
Miymanlarǵa kitapxananıń tariyxı, búgingi kúndegi jumısı haqqında maǵlıwmat berildi. Ózbekstan tárepi usı mákeme ushın belgili jazıwshı Shınǵıs Aytmatovtıń ózbek tilindegi shıǵarmaların tapsırdı.

N.Usmonova, ÓzA