2-8-aprel kúnleri Nókis qalasında sporttıń voleybol túrinen 19 jasqa shekemgi jaslar arasında Ózbekstan chempionatı bolıp ótti.

CHempionat juwmaǵında, Qashqadárya wálayatı komandası birinshi orındı iyelewge miyasar boldı.
Finalǵa shekem hesh bir jeńiliske ushıramaǵan Ferǵana wálayatı komandası ekinshi, respublikamız komandası sıylı úshinshi orındı iyelewge eristi.
Al, qızlar arasında bolsa, birinshi orındı Ándijan wálayatı komandası jeńip aldı.
CHempionlıq ushın bellesiwlerde azıraq áwmet jetpegen respublikamız komandası gúmis, Xorezm wálayatı komandası qola medalların qolǵa kirgizdi.
-Sońǵı jılları elimizde Prezidentimizdiń basshılıǵında sport tarawın, sonıń ishinde, komandalıq oyın túrlerin rawajlandırıwǵa ayrıqsha itibar qaratılıp, búgingi kúni mámleketimizdiń barlıq aymaqlarında futbol, voleybol, gandbol, basketbol sıyaqlı sport túrleri jedel rawajlanbaqta,-deydi voleybol boyınsha respublikamızǵa belgili trener Azat Kazakov.-Bul sózimizdiń ayqın mısalın, búgingi ótkerilgen jarısta kóriwimizge boladı. Atap aytqanda, burınǵı ótkerilgen chempionatlarda Tashkent qalası, Namangan, Nawayı, Xorezm wálayatları respublikamız komandasına tiykarǵı qarsılas sıpatında qaralǵan bolsa, bıyılǵı jarısta Qashqadárya, Ándijan, Ferǵana wálayatları komandaları da ózleriniń sheberliklerin kórsetip, jaqsı nátiyjelerge eristi.
Jarıs juwmaǵında, jeńimpazlar shólkemlestiriwshiler tárepinen tayarlanǵan diplom, medal hám bahalı sawǵalar menen sıylıqlandı.

Adilbay Orazov,
Qaraqalpaqstan xabar agentligi sholıwshısı.