Qaraqalpaqstan delegaciyasınıń Koreya mámleketindegi áhmiyetli sóylesiwleri dawam etip, sapardıń juwmaqlawshı kúninde Qaraqalpaqstan delegaciyası Jeonbuk provinciyasındaǵı Daejeon polytechnik oqıw orayında boldı.

Bul oqıw ornında jılına 12 mıńnan aslam jaslar bilim alıp, jańa texnologiyalar tiykarında mamanlıqqa iye bolıp shıǵıp atırǵanın atap ótiw orınlı. Texnika, IT, elektro energetika hám basqa da qánigelikler boyınsha teoriyalıq hám ámeliy bilimler berilip, bántligin támiyinlewge járdem beriledi.
Oqıw ornı administraciyası menen ushırasıwda eki tárepleme birge islesiw, usı imkaniyatlardan paydalanıp, Qaraqalpaqstan jaslarınıń da bántligin támiyinlew, olardı zamanagóy kásiplerge oqıtıw boyınsha sóylesiwler alıp barılıp, jaqın sheriklik qatnasıqların ornatıw boyınsha kelisip alındı.
Bunnan soń Smart Farm (Aqıllı ferma) wákilleri menen ushırasıw ótkerilip, aqıllı fermada teplicalardıń imkaniyatlarınan joqarı ónim alıwda paydalanıw, onda zamanagóy kózqaraslar arqalı ónimdarlıqtı arttırıw boyınsha jaslarǵa bilim beriw máseleleri talqılandı. Sóylesiwler barısında óz-ara tájiriybe almasıw hám jańa jumıs orınların jaratıw baǵdarında birge islesiw boyınsha kelisip alındı.
Sapar dawamında Qaraqalpaqstan delegaciyası provinciya vice gubernatorı menen ushırastı.
Ushırasıwda Koreya hám Ózbekstan arasındaǵı doslıq, tıǵız birge islesiw qatnasıqlarınıń bekkemlenip atırǵanı, eki mámleket arasında, sonıń ishinde, Qaraqalpaqstan menen turizm tarawın rawajlandırıw, jaslardı kásipke baǵdarlaw arqalı bántligin támiyinlewge járdemlesiw máseleleri boyınsha sóylesiwler alıp barıldı.
Bunnan soń Sejong institutı wákilleri menen de ushırasıw ótkerilip, onda Sejong institutı hám Qaraqalpaq mámleketlik universiteti arasında til úyreniw orayın ashıw boyınsha kelisimge qol qoyıldı.

Qaraqalpaqstan xabar agentligi