Taqıyatas rayonındaǵı Naymankól awıl puqaralar jıyını aymaǵında jaylasqan “Ábdiraxman Álibek Xojeli” agrofirmasınıń 6 gektarlıq baǵında baǵdıń qatar aralarındaǵı jerlerden utımlı paydalanıw usılları boyınsha kórgizbeli seminar shólkemlestirildi.

Onda rayondaǵı baǵshılıqqa qánigelesken diyqan fermerler, taraw qánigeleri qatnastı.
Ótkerilgen seminarda Qaraqalpaqstan Respublikası Awıl xojalıǵı ministrligi janındaǵı agroxızmetler orayı hám Agrosanaattı rawajlandırıw agentliginiń qánigeleri tárepinen baǵshılıq tarawın rawajlandırıw boyınsha usınıslar berildi.
Onda miyweli baǵ aralarındaǵı jerlerden nátiyjeli paydalanıp palız hám basqa da ónimlerdi jetistiriw, eginlerde ushırasatuǵın zıyanlı keselliklerge qarsı preparatlardı qollanıw, topıraq ónimdarlıǵın arttırıwda agrotexnikalıq ilajlardı óz waqtında ámelge asırıw boyınsha bir qatar jumıslar túsindirip ótildi.
– Búgingi kúnde Taqıyatas rayonında jámi 46 fermer xojalıǵı hám awıl xojalıǵı kárxanalarında 208 gektarlıq baǵ maydanları bar. Sonnan 107 gektarı ónim berip turıptı, al, 101 gektarı jas baǵlar bolıp esaplanadı. Búgingi kúnde Prezidentimizdiń tiyisli qarar hám pármanlarınıń orınlanıwın támiyinlew, qalaberse, jerlerden utımlı paydalanıw maqsetinde baǵlardıń qatar aralarına baw-baqsha hám palız eginlerin egiw shólkemlestirilmekte. Búgingi seminarda baǵdıń qatar aralarınan nátiyjeli paydalanıw, egin egiw usılları, agrotexnikalıq ilajları boyınsha qánigeler tárepinen túsinik jumısları alıp barıldı,-deydi Agrosanaattı rawajlandırıw agentliginiń Taqıyatas rayonlıq qánigesi Jetkinshek Ibraymov.
Bıyılǵı jılı rayonımızda jámi 20 gektar baǵ jaratıw hám júzim atızların payda etiw rejelestirilgen. Bul jumıslar házirgi waqıtta juwmaqlanıw aldında turıptı. Bundaǵı maqset eksport kólemin arttırıw hám bazarlarımızdı arzan hám sapalı ónimler menen támiyinlew bolıp esaplanadı.
Ilajda qatnasıwshılardıń da pikir-usınısları tıńlanıp, baǵdıń qatar aralarına plyonka astına palız eginleri egildi.

Á.Jiyemuratov,
Qaraqalpaqstan xabar agentligi.