Qaraqalpaqstan Respublikası Transport ministrliginde respublikamızdıń transport tarawında 2025-jıldıń birinshi shereginde ámelge asırılǵan jumıslar hám aldaǵı isleniwi tiyis wazıypalarǵa baǵıshlanǵan baspasóz konferenciyası bolıp ótti.

Konferenciyaǵa ministrlik basshıları hám ǵalaba xabar qurallarınıń wákilleri qatnastı.
Ánjumanda respublikamızdıń transport tarawında alıp barılıp atırǵan jumıslar hám aldaǵı isleniwi tiyis wazıypalar boyınsha Qaraqalpaqstan Respublikası Transport ministriniń orınbasarı B.Yusupov, Qońırat temir jol uzeli baslıǵı A.Palımbetovlar keń túrde maǵlıwmat berdi.
-Bıyıl respublikamız paytaxtına 13 zamangóy avtobuslar alıp kelinip, Nókis qalası turǵınlarına sapalı xızmet kórsetpekte. Aldaǵı waqıtları bunnan tısqarı 160 avtobus alıp keliniwi rejelestirilgen,-deydi ministrliktiń baspasóz xatkeri Zahida Qaljanova.-Sonday-aq, temir jol hám aviatransport salasında kóplegen ózgerisler menen jańalanıwlar júz berip, jańa jónelisler ashılmaqta.
Ilajda jurnalistler tiyisli qánigelerden búgingi kúni keń jámiyetshilikti oylandırıp júrgen máseleler boyınsha tolıq maǵlıwmatlar alıp, isleniwi tiyis bolǵan jumıslar haqqında óz pikirlerin bildirdi.

Adilbay Orazov,
Qaraqalpaqstan xabar agentligi sholıwshısı