«Hududgaz Qoraqalpoǵiston» gaz támiynatı filialında tarawǵa baylanıslı sońǵı jılları elimizde shıǵarılıp atırǵan huqıqıy-normativlik hújjetlerdiń áhmiyetin keń jámiyetshilikke jaqınnan tanıstırıw, jámáátte korrupciyaǵa qarsı gúresiw boyınsha immunitetti qáliplestiriwge baǵıshlanǵan seminar bolıp ótti.

Seminarǵa filial basshıları, bólim baslıqları, sonday-aq onlayn-konferencbaylanıs arqalı qala hám rayonlardaǵı bólimlerdiń basshıları hám bas injenerleri, «Ózenergoinspekciya» Qaraqalpaqstan Respublikası basqarması, Xalıq qabıllawxanası hám Ádillik ministrliginiń juwapker qánigeleri qatnastı.
Ilajda «Hududgaz Qoraqalpoǵiston» gaz támiynatı filialı direktorınıń orınbasarı Nurlan Jumaniyazov, «Ózenergoinspekciya» Qaraqalpaqstan Respublikası basqarması jetekshi kánigesi Abdimalik Saparov, Xalık kabıllawxanası Xojeli rayonlık bólimi qánigesi Gúlziyba Xojametova, Ádillik ministrliginiń Nókis kalalık bólimi qánigeleri Shaxislam Mambetsaliev, Dilaram Genjebaevalar tárepinen sońǵı jılları elimizde gaz támiynatına baylanıslı shıǵarılıp atırǵan huqıqıy-normativlik hújjetlerdiń áhmiyeti, energiya resurslarınan aqılǵa uǵras paydalanıw, sonday-aq, tarawda korrupciyalıq jaǵdaylardıń aldın alıw, gaz tarawında jumıs islewshi hár bir qánigeniń huqıqıy sawatın arttırıp barıw boyınsha pikirleri tıńlandı.
-Haqıyqatında da sońǵı jılları korrupciyaǵa qarsı gúresiw boyınsha bir qatar nızamlar qabıl etilip, usı tiykarda pútkilley jańa sistema jaratılmaqta,-deydi Xalık kabıllawxanası Xojeli rayonlık bólimi qánigesi Gúlziyba Xojametova.- Parlamentimiz palatalarında juwapker komitetler, Korrupciyaǵa qarsı gúresiw milliy keńesi hám Agentlikler, óndirislik hám hızmet kórsetiw kárxanalarında korrupciyaǵa qarsı gúresiw bólimleri shólkemlestirildi.
Seminarda sózge shıqqanlar óz sózinde korrupciya reformalar jolındaǵı eń úlken tosqınlıq ekenligin ayrıqsha atap ótti.
Ótkerilgen ilaj dawamında qatnasıwshılar qánigelerge ózlerin qızıqtırǵan sorawların berip, olarǵa juwap aldı.

Qaraqalpaqstan xabar agentligi