Ózbekstan Respublikası Prezidentiniń “Islam rawajlanıw banki hám OPEK xalıqaralıq rawajlanıw qorı qatnasıwında “Awıllıq jerlerdi turaqlı rawajlandırıw” joybarın ámelge asırıw ilajları haqqında”ǵı qararı tiykarında Beruniy rayonına 16,2 mln. AQSh dolları muǵdarında qarjılar ajıratıw rejelestirilgen, – dep maǵlıwmat beredi Beruniy rayonı hákimligi Málimleme xızmeti bólimi baslıǵı A.Urazova.

Sonıń 23 mlrd sumnan aslamı «Abay» APJ aymaǵın rawajlandırıw (sociallıq taraw obektleri, infrastruktura menen baylanıslı mashqalalar) ushın ajıratılıwı belgilengen. 1-basqıshta qurılısı belgilengen máhálle kompleksiniń imaratı paydalanıwǵa tapsırıldı.
– Komplekstiń 1-qabatında máhálle imaratı jaylasqan bolıp, joqarı qabatlarında oqıw kursları, kovorking hám IT orayı, sport salamatlandırıw zonası, tigiwshilik, erler hám hayal-qızlar shashtárezxanası, nan pisiriw cexı hám dúkanlar shólkemlestirilgen, – deydi A.Urazova.
“Awıllıq jerlerdi turaqlı rawajlandırıw” joybarı sheńberinde Abay awıl puqaralar jıyını aymaǵında 6,1 mlrd sumlıq 8,5 km topıraq jollardı asfaltlaw, 17 mlrd sumnan artıq qarjı esabınan 90 orınlıq balalar baqshası, 3 qabatlı máhálle hám xalıqqa xızmet kórsetiw imaratın qurıw, 68-sanlı mektepke qosımsha oqıw imaratın qurıw hám 17-sanlı mektep imaratın ońlaw rejelestirilgen.
1-basqıshta qurılısı belgilengen 1 mektepke shekemgi bilimlendiriw shólkemi hám 3 qabatlı máhálle hám xalıqqa xızmet kórsetiw imaratlarınan, joybar bahası 3 mlrd. 800 mln sumlıq 1 qabatlı 90 orınlıq mektepke shekemgi bilimlendiriw shólkeminiń imaratı “Qirqqiz maxsus qurilish” JShJ tárepinen qurıp pitkerildi.
Sonday-aq, 90 orınlıq mektepke shekemgi bilimlendiriw shólkemi jaqın kúnlerde paydalanıwǵa tapsırıladı.

Qaraqalpaqstan xabar agentligi