Ózbekstan hám Evropa mámleketleri arasındaǵı birge islesiw jıldan-jılǵa rawajlanbaqta. Samarqand qalasında usı jılıdń 3-4-aprel kúnleri ótkerilgen «Oraylıq Aziya – Evropa Awqamı» birinshi sammiti de ishki region arasındaǵı baylanıslardı bunnan bılay da bekkemlew, xalıqaralıq hám regionallıq siyasattıń áhmiyetli tárepleri boyınsha pikir alısıwda áhmiyetli platforma boldı. Ózbekstan Evropa Awqamı hám Evropa mámleketleri menen birge islesiwdi óziniń sırtqı siyasatınıń áhmiyetli baǵdarlarınan biri dep biletuǵının atap ótiw kerek.

Ánjumanda mámleketimiz basshısı atap ótkenindey, ulıwma siyasiy erk-ıqrarı sebepli Oraylıq Aziyadaǵı tereń transformaciya processleri turaqlı hám izge qaytpas túrge endi. Isenim hám jaqın qońsıshılıq bekkemlenbekte, keń kólemli birge islesiw hám kooperaicyalıq baylanıslar keńeymekte.
«Oraylıq Aziya – Evropa Awqamı» formatındaǵı óz-ara birge islesiw sistemalı rawajlanıp barǵan sayın jetilispekte. Bul baǵdarda Ispaniya Patshalıǵınıń mámleketimiz benen birge islesiwin tallaytuǵın bolsaq, eki tárepleme baylanıslar jańa basqıshqa kóterildi. Ispaniya Evropa Awqamındaǵı ekonomikası rawajlanǵan mámleketlerden biri bolıp tabıladı. Ózbekstan ǵárezsizligin 1991-jılı 31-dekabrde tán alǵan Ispaniya menen diplomatiyalıq qatnasıqlar 1992-jıl 17-martta ornatılǵan. Ótken jıllar dawamında eki mámleket arasındaǵı birge islesiw jetilisip bardı. Prezidentimiz Shavkat Mirziyoevtiń 2017-jıldıń iyun ayında Astana qalasında ShBSh sammiti sheńberinde bolıp ótken Ispaniya patshası Fillipp VI menen ushırasıwı birge islesiwdiń nátiyjeliligin bunnan bılay da arttırdı. Barlıq tarawlarda baylanıslardı bekkemlew baǵdarındaǵı jumıslardıń kólemi keńeydi Sırtqı isler ministrligi arasında siyasiy másláhátlesiwler ótkeriw mexanizmi qáliplesti. Doslıq baylanısların rawajlandırıw hám qollap-quwatlawda eki mámleket wákillik uyımlarında dúzilgen deputatlıq toparları úlken áhmiyetke iye bolmaqta. Ózbekstan hám Ispaniya Ombudsman institutları arasında birge islesiw haqqında qol qoyılǵan kelisim de nátiyjeli boldı.
Ózbekstan hám Evropa Awqamı arasındaǵı Sheriklik hám birge islesiw haqqındaǵı kelisimge muwapıq Ispaniya menen sawda boyınsha eń qolaylı mámleketlik rejim ornatıldı. Búgingi kúnde mámleketimizde Ispaniya kompaniyalarınıń qatnasıwında 16 kárxana jumıs alıp barmaqta. Olardan 8i birgeliktegi kárxana sıpatında, 8 i 100 procent ispan kapitalı tiykarında jumıs alıp barmaqta. Eki mámleket isbilermen toparlarınıń baylanısların bekkemlew hám keńeytiwden óz-ara mápdar ekeni sezilerli dárejede artıp atırǵanın atap ótiw kerek. Agrosanaat, azıq-awqat, ximiya, toqımashılıq, turizm, farmacevtika, vinoshılıq, mashina qurılısı sanaatı eki mámleket arasındaǵı birge islesiwdiń perspektivalı baǵdarlarınan biri bolıp tabıladı. Mádeniy-gumanitarlıq tarawdaǵı birge islesiw 2001-jılı qol qoyılǵan Mádeniyat hám bilimlendiriw tarawında birge islesiw haqqındaǵı kelisim tiykarında ámelge asırılmaqta.
Bul hújjetke bola, hár qıylı ilajlar shólkemlestirilmekte. Sonıń ishinde, 2004-jıldıń aprel-may aylarında Tashkent hám Samarqand qalalarında Ámir Temur mámleketi menen Kastiliya Patshalıǵı arasında diplomatiyalıq qatnasıqlar ornatılǵanınıń 600 jıllıǵı keńnen belgilendi. 2006-jılı Madridte Ámir Temur tuwılǵanınıń 670 jıllıǵı hám mámleketler arasında diplomatiyalıq qatnasıqlar ornatılǵanınınń 600 jıllıǵına baǵıshlanǵan xalıqaralıq konferenciya bolıp ótti.
Bilimlendiriw tarawındaǵı birge islesiw baylanısları da jıldan-jılǵa bekkemlenbekte. Ózbekstan jáhán tilleri universiteti menen Madrid, Granada, Alkala de Xenares hám Malaga universitetleri arasında birge islesiw jedel rawajlanıp atır. 2019-jılı Kastiliya-La-Mancha universiteti Samarqand mámleketlik shet tilleri institutı hám Ózbekstan jáhán tilleri universiteti janında eki ispan tili hám mádeniyatı orayın ashtı. Jáhán ekonomikası hám diplomatiya universiteti hám San-Pablo universiteti, sonday-aq, Santyago de Kompostela universiteti hám Tashkent pediatriya medicina institutı arasında birge islesiw memorandumlarına qol qoyılǵan.
Eki mámlekettiń bay tariyxıy miyrası hám mádeniyatı nátiyjesinde turizm tarawında birge islesiw ushın úlken imkaniyatlar bar. Keyingi 8 jılda eki tárepleme ekonomikalıq qatnasıqlardıń óz-ara sawda kólemi eki esege artqan jáne Ózbekstanda birgeliktegi kárxanalardıń sanı derlik eki esege kóbeygen. Ispaniya Evropa Awqamınıń eń tiykarǵı drayverlerinen biri sıpatında dúnyaǵa belgili hám óz tariyxı, mádeniyatı menen belgili. Búgin bul mámleket Ózbekstan menen tıǵız birge islesiw baylanısların bekkemlegen. Samarqand sammiti áne usı keń kólemli, hár tárepleme paydalı baylanıslardı bunnan bılay da bekkemlewde jańa sheklerdi ashıp beredi.

Behruz XUDOYBERDIEV,
ÓzAnıń xabarshısı