Sońǵı jılları Prezidentimizdiń basshılıǵında xalıqaralıq birge islesiwlerdi rawajlandırıw boyınsha oǵada kólemli ilajlar ámelge asırılmaqta. Usı tiykarda bir qatar sırt mámleketler, sonıń ishinde, Koreya mámleketi menen de tıǵız birge islesiw qatnasıqları ornatılıp, bekkemlenip barmaqta.

Qaraqalpaqstan Respublikası Joqarǵı Keńesiniń komitet baslıǵı M.Atamuratovtıń basshılıǵındaǵı Qaraqalpaqstan delegaciyasınıń usı mámleketke saparı dawamında Koreyanıń Seul qalasında «Koreya-Ózbekstan (Qaraqalpaqstan) birge islesiwin rawajlandırıw orayı»nıń ashılıw máresimi ótkerildi.
Onda Ózbekstannıń Koreyadaǵı elshisi A.Abdusalomov, People and Dream fondı basshıları, Koreya-Ózbekstan tıǵız birge islesiw qatnasıqları sheńberinde mámleketimizdiń regionları hám isbilermenleri menen birge islesiwdi jolǵa qoyǵan iri kompaniya wákilleri, oqıw orınları professorları, mámleketlik uyımlardıń wákilleri qatnastı.
Bul ilaj eki mámleket arasında ótken jıldıń aqırınan berli ótkerilgen ámeliy másláhátlesiwler hám birge islesiw kelisimleriniń nátiyjesi bolıp, Koreya hám Ózbekstan arasındaǵı turaqlı birge islesiwde jańa burılıs noqatına tiykar jarattı.
Ashılıw máresiminde oray basshısı Li Seok Xenge Qaraqalpaqstan Respublikasınan tayınlanǵan rásmiy xat tapsırılıp, Qaraqalpaqstan Respublikası hám “Xalıq” fondı arasında oraydıń jumısı haqqında isbilermenlik shártnamasına qol qoyıldı.
Ilajda oraydıń biznes-rejesi hám onı ámelge asırıw strategiyasınıń prezentaciyası boyınsha da qızǵın dodalawlar bolıp ótti. Elshi Alisher Abdusalomov: “Qaraqalpaqstan Respublikası Ózbekstan ushın oǵada áhmiyetli region bolıp tabıladı hám usı birge islesiw hám rawajlanıw orayınıń ashılıwı eki mámleket arasında óz-ara túsinisiw hám abadanlıqqa alıp keletuǵınına úmit etemen,” – dedi hám elshixana birge islesiw orayınıń jumısın belsene qollap-quwatlaytuǵının qosımsha etti.
Jańadan shólkemlestirilgen bul oray birgelikte biznes-rejelerdi ámelge asırıw, ekonomikalıq hám investiciyalıq birge islesiwlerdi jolǵa qoyıw, joqarı bilimlendiriwde óz-ara tájiriybe almasıw hám jańa jumıs orınları máseleleri boyınsha tıǵız sheriklik qatnasıqların kúsheytiwge xızmet etetuǵınlıǵın atap ótiw orınlı.

Qaraqalpaqstan xabar agentligi.