Sońǵı jılları húrmetli Prezidentimiz tárepinen alıp barılǵan keń kólemli reformalar nátiyjesinde, Aralboyı regionın rawajlandırıw máselesi mámleketimizdi rawajlandırıwdıń baslı baǵdarlarınıń biri bolıp kelmekte.

Ózbekstan Respublikası Prezidentiniń Qaraqalpaqstanǵa bolǵan ayrıqsha itibarı nátiyjesinde ótkerilgen Aral mádeniyat sammiti sheńberinde Qaraqalpaqstan Respublikası Joqarǵı Keńesiniń Baslıǵı Amanbay Orınbaev BMSh Rawajlanıw baǵdarlaması (UNDP) Administraciyası járdemshisi, BMSh Rawajlanıw baǵdarlamasınıń Evropa hám ǴMDA boyınsha regionallıq byurosınıń direktorı Ivana Jivkovich penen ushırastı.
Ushırasıwda mámleketimizde Birlesken Milletler Shólkeminiń Rawajlandırıw baǵdarlaması menen birgelikte xalqımızdıń turmıs abadanlıǵın arttırıwǵa qaratılǵan baslamalardı rawajlandırıw boyınsha ámelge asırılıp atırǵan ilajlar keń túrde atap ótildi.
Sonday-aq, klimat ózgerisi aqıbetlerin qorǵaw hám oǵan qarsı gúresiw máseleleri Evropa awqamı menen birge islesiwdi bunnan bılay da jetilistiriw boyınsha ámeliy ilajlar oǵada áhmiyetli ekenligi atap ótildi.
Ótkerilgen ushırasıw dawamında mámleketimiz, sonıń ishinde, Qaraqalpaqstan hám BMSh Rawajlanıw Baǵdarlaması arasında birge islesiwdi keńeytiw máseleleri, atap aytqanda, Qaraqalpaqstan hám Aralboyı regionın turaqlı rawajlandırıw boyınsha keń túrde pikir alıstı.

Qaraqalpaqstan xabar agentligi