Ózbekstan Respublikası Prezidenti Shavkat Mirziyoev 4-aprel kúni Samarqand klimat forumı sheńberinde BMSh strukturaları hám bir qatar xalıqaralıq shólkemlerdiń basshıların qabılladı.

BMSh Bas xatkeriniń orınbasarı Evropa ekonomikalıq komissiyasınıń atqarıwshı xatkeri Tatyana Molchan mámleketimiz basshısına BMSh Bas xatkeri Antoniu Guterrishtiń sálemi hám qızǵın tileklerin jetkerdi.
Shavkat Mirziyoev komissiyanıń 2030-jılǵa shekemgi dáwirde Turaqlı rawajlanıw maqsetlerine erisiwdegi áhmiyetli ornı, sonday-aq, transport, innovaciyalar, toqımashılıq, energetika, ekologiya hám gender teńlik tarawlarında, Ózbekstannıń JSShǵa aǵza bolıwı máselelerinde kórsetilip atırǵan ekspertlik járdemin ayrıqsha atap ótti.
Regionallıq hám mámleketlik kólemdegi joybarlardı ámelge asırıw, sonday-aq, Ózbekstan Respublikası Prezidenti tárepinen 2023-jıl noyabr ayında Baku qalasında bolıp ótken BMShtıń Oraylıq Aziya ekonomikaları ushın arnawlı baǵdarlaması (SPEKA) birinshi sammitinde bildirilgen baslamaların ámeliy alǵa qoyıw tárepleri dodalandı.
Ózbekstan tárepiniń usınısına bola, SPEKAnıń 2030-jılǵa shekem rawajalanıw koncepciyası qabıl etligeni, EAK penen sawda tártip-qaǵıydaların ápiwayılastırıw boyınsha «jol kartası»na qol qoyılǵanı, Transkaspiy koridorı sheńberinde sanlastırıw hám hújjetler almasıwı boyınsha kompleksli ilajlar izbe-iz ámelge asırılıp atırǵanı qanaatlanıwıshılıq penen atap ótildi.
Jıl basında komissiya járdeminde Ózbekstan Xalıqtıń ekologiya jaǵdayı haqqındaǵı isenimli málimlemeden paydalanıwı haqqındaǵı Orxus konvenciyasına qosıldı.
Hawa konvenciyası hám Sanaat avariyalarınıń transshegaralıq tásiri haqqındaǵı konvenciyaǵa qosılıw máselesi islep shıǵılmaqta.
SPEKA baǵdarlamasınıń Maqsetli qorın tez pursatta iske qosıw áhmiyetli ekeni atap ótildi.
BMSh Bas xatkeriniń orınbasarı, BMShtıń elatlı punktler boyınsha baǵdarlamasınıń (BMSh – Xabitat) atqarıwshı direktorı Anaklaudiya Rossbax penen ushırasıw waqtında usı abıraylı institut penen qalalardı turaqlı rawajlandırıw, infrastrukturanı modernizaciyalaw hám xalıqtıń turmıs sapasın arttırıw baǵdarında kóp táreplemeli sheriklikti rawajlandırıw máseleleri kórip shıǵıldı.
BMShtıń joqarı dárejeli wákili mámleketimizde «aqıllı» hám «jasıl» qalalardı turaqlı rawajlandırıw, xalıq ushın qolaylı ortalıq jaratıwǵa qaratılǵan urbanizaciya tarawındaǵı reformalardı unamlı bahaladı.
Qalalardı basqarıwǵa zamanagóy sanlı sheshimlerdi engiziw, «jasıl» qurılıs standartların islep shıǵıw, qala ortalıǵında klimat ózgeriwine beyimlesiw boyınsha arnawlı baǵdarlamanı iske qosıw baǵdarındaǵı birge islesiwdi keńeytiw áhmiyetli ekenligi atap ótildi.
Ózbekstanda Pútkil jer júzilik tazalıq kúnin ótkeriw hám Tashkentte shólkem ofisin ashıw máseleleri kórip shıǵıldı. Ámeliy birge islesiw baǵdarları boyınsha «jol kartası»n qabıl etiwge kelisip alındı.
BMSh Bas xatkeriniń orınbasarı, Shólleniwge qarsı gúresiw konvenciyasınıń atqarıwshı xatkeri Ibrahim Tiav penen ushırasıwda mámleketimiz hám regionımızda shólleniw, jerler delegaciyasına qarsı gúresiw tarawında BMShtıń usı abıraylı strukturası menen birge islesiwdi jáne de rawajlandırıwdıń áhmiyetli máseleleri kórip shıǵıldı.
BMSh wákili Ózbekstan basshısınıń forumdaǵı shıǵıp sóylegen sózin joqarı bahalap, klimat qáwip-qáterlerine qarsı gúresiw boyınsha alǵa qoyılǵan baslamalardıń áhiyetli ekenligin hám Oraylıq Aziyanıń «Jasıl» rawajlanıw koncepciyası óz waqtında usınıs etilgenin atap ótti.
Ótken jıldıń avgust ayında BMSh Bas Assambleyası Ózbekstan tárepinen alǵa qoyılǵan toǵaylardı tiklew boyınsha rezolyuciyanı bir awızdan maqullanǵanı, sonday-aq, jerler degradaciyasınıń aldın alıw boyınsha milliy maqsetlerdi islep shıǵıw baslanǵanı qanaatlanıwshılıq penen atap ótildi.
Tashkent qalasındaǵı «Jasıl universitet» negizinde Jerler degradaciyası hám shólleniwge qarsı gúresiw boyınsha xalıqaralıq ilimiy tarmaqtı shólkemlestiriwge Konvenciya ekspertleriniń tartılıwı belgilendi.
Birlesken Arab Ámirlikleri energetika hám infrastruktura ministri Suhayl al-Mazruiy basshılıǵındaǵı delegaciya menen ushırasıw aldında ministr mámleketimiz basshısına BAÁ Prezidenti Shayx muhammad Ol Nahayan, Bas ministri, Dubay ámiri Shayx muhammad Ol Maktum hám vice-prezidenti Shayx mansur Ol Nahayannıń sálemin hám eń jaqsı tileklerin jetkerdi
Qabıl etilgen «jol kartası» tiykarında tiykarǵı baǵdarlarda ámeliy birge islesiwdi jáne de keńeytiw máseleleri kórip shıǵıldı.
Ózbekstan Prezidentiniń bıyılǵı jıldıń yanvar ayında BAÁge ámelge asırǵan saparınıń tariyxıy juwamqları, nátiyjede eki mámleket arasındaǵı kóp tárepleme qatnasıqlar strategiyalıq sheriklik dárejesine kóterilgeni ayrıqsha qanaatlanıwshılıq penen atap ótildi.
Óz-ara sawda kólemi, birgeliktegi kárxanalar hám tikkeley parwazlar sanı turaqlı artıp barmaqta. Ámirliklerdiń jetekshi kompaniyalarınıń qatnasıwındaǵı joybarlar portfeli derlik 20 milliard dollardı quramaqta.
Ózbekstan aymaqlarında «jasıl» energetika, elektrotexnika, awıl xojalıǵı, suw xojalıǵı, kommunal hám transport infrastrukturasın modernizaciyalaw boyınsha kooperaciya joybarların alǵa qoyıwǵa ayrıqsha itibar karatıldı.
Bolajaq joqarı dárejedegi ilajlarǵa tayarlıq máseleleri de kórip shıǵıldı.
Soń mámleketimiz basshısı Ózbekstan-Saudiya isbilermenler keńesiniń baslıǵı, “ACWA Power” kompaniyası basqarması baslıǵı Muhammad Abunayyandı qabıl etti.
Saudiya Arabstanı kompaniyaları menen ámeliy birge islesiwdi jáne de keńeytiw máseleleri kórip shıǵıldı.
Prezidentimiz Ózbekstannıń «jasıl» energetika tarawında strategiyalıq investor bolǵan “ACWA Power” kompaniyası menen nátiyjeli sheriklik jedel rawajlanıp atırǵanın qanaatlanıwshılıq penen atap ótti. Búgingi kúnde kompaniya menen ámelge asırılıp atırǵan birgeliktegi joybarlar portfeli 15 milliard dollarǵa jetti.
Ótken jıldıń dekabr ayında Buxara wálayatında hár biri 500 megavattlı 2 samal elektr stanciyası tarmaqqa qosıldı, sonday-aq, Samarqand wálayatında ulıwma quwatlılıǵı 1 gigavvat bolǵan eki quyash stanciyası hám Tashkent wálayatında energiya saqlaw sistemaların qurıw joybarları baslandı.
«Jasıl» energetika, infrastruktura, farmacevtika, ıssılıq hám suw támiynatın modernizaciyalaw, turaq jay kommunal xojalıǵı hám basqa tiykarǵı baǵdarlardaǵı joybarlardı jedel ámelge asırıw áhmiyetli ekenligi atap ótildi.
Usı mániste, bıyılǵı jılı Samarqand qalasında ótkeriliwi rejelestirilgen Húkimetleraralıq komissiya májilisi hám biznes forumına puqta tayarlıq kóriw zárúr ekenligi atap ótildi.

ÓzA