Usı jıl 7-15-aprel kúnleri Qıtay Xalıq Respublikasınıń Usi qalasında qılıshlasıw boyınsha óspirimler hám jaslar arasındaǵı jáhán chempionatı bolıp ótedi.

Xabar berilgenindey, dúnyanıń eń kúshli jas qılıshpazları jámlengen bul jarısqa Ózbekstannıń saylandı komandası aǵzaları da qızǵın tayarlıqlar kórdi.
Bul chempionatta (Wuxi-2025) Ózbekstannan jámi 22 sportshı medallar ushın gúresedi.
CHempionattı sablyashılar baslap beriwi kútilmekte.
Qaraqalpaqstan jaslarınan XIX Aziya oyınları (Xanchjou, 2022) chempionı (komandalıq), 5 márte Aziya chempionı Gúlistan Perdebaeva, Aziya chempionı, “Mard uǵlon” sıylıǵı iyesi Musa Aymuratov, Aziya chempionları Islambek Abdazov, Nargiza Jaqsıbaevalar qatnasadı.
Ayakóz Jumamuratova jekkelikte túspeydi, al komandalıq jarıslarda bellesedi.
Jarıs aldınan keshe zalda sportshılardıń sport kiyimleriniń, sport qurallarınıń sazlıǵı birme-bir kózden ótkerildi. Búgin qılıshlasıw sportı boyınsha Jáhán chempionatınıń jaslar arasındaǵı er hám qız balalar arasında jekkelik jarıslarına start beriledi.

Sportshı jaslarımızǵa áwmet tileymiz!!!
Qaraqalpaqstan xabar agentligi