Ózbekstan mámleketlik kórkem óner hám mádeniyat institutı Nókis filialında «Ózbekstan – ulıwma úyimiz!» atamasında ruwxıy aǵartıwshılıq ilajı bolıp ótti.

Ilaj sheńberinde filialda awızbirshilikli hám tatıw, doslıq qatnasıqlarında oqıp bilim alıp atırǵan túrli millet wákilleri esaplanǵan student-jaslardıń, sonday-aq, elimizde jumıs alıp barıp atırǵan milliy-mádeniy oraylardıń milliy kórgizbeleri, dástúrleri, úrp-ádetleri, milliy qosıqları hám ayaq-oyınları ilaj qatnasıwshılarınıń názerine usınıldı.
Ilajda Qaraqalpaqstan Respublikası Ministrler Keńesi Baslıǵınıń orınbasarı R.Nurazizov, Qaraqalpaqstan Respublikası Joqarǵı Keńesiniń deputatı A.Tolıbekov, Qaraqalpaqstan Respublikası Sudınıń sudyası E.Uteniyazov hám miynet nuranıyı B.Sulanovlar miymanda boldı.
Ilajdı filial direktorı A.Ayapov kiris sóz benen ashtı hám basqarıp bardı.
Keshede shıǵıp sóylewshiler tárepinen sońǵı jılları elimizde milletler aralıq tatıwlıq, puqaralardıń huqıq hám erkinliklerin támiyinlew hám kóp milletli xalqımızdıń doslıqta jasap kiyatırǵanlıǵı maqtanısh penen tilge alındı.
Haqıyqatında da, búgingi kúni mámleketimizde 130 dan aslam hár qıylı millet wákilleri óz-ara tatıw hám awızbirshilikte jasap, xalqımız bir maqset, bir ideya jolında birlesip, elimizdiń rawajlanıwı jolında miynet etpekte.
Ilajda filial student-jasları tárepinen elimizde jasawshı tuwısqan xalıqlardıń milliy qosıq hám ayaq oyınları atqarılıp, bul jıynalǵanlarǵa ózgeshe zawıq baǵıshladı.

Adilbay Orazov,
Qaraqalpaqstan xabar agentligi sholıwshısı.