Bozataw rayonı Erkindárya awıl puqaralar jıyını aymaǵında «Qıytaq jer mádeniyatı, qıytaq jerden nátiyjeli paydalanıw hám dáramat tabıw» atamasında seminar ótkerildi.

Ótkerilgen seminarǵa Bozataw rayonı hákimi B.Ubbiniyazov, Ózbekstan Respublikası Transport ministriniń orınbasarı I.Abdugafarov, rayon aymaǵındaǵı tiyisli taraw basshıları, máhálle jetiligi, sonday-aq, aymaq turǵınları qatnastı.
Seminar qatnasıwshıları dáslep Erkindárya APJ «Máhálle» kóshesi turǵını B.Beknazarovtıń shańaraǵında boldı. Bul jerde olar toqsanbastı usılındaǵı eginlerdi egiw, piyaz hám chesnok jetistiriw usılları menen jaqınnan tanıstı.
Bunnan soń ilaj shólkemlestiriwshileri puqaralardıń qıytaq jerden nátiyjeli paydalanıw imkaniyatların keńeytiw, olardıń eksportqa jaramlı eginlerdi jetistiriwi boyınsha bilimlerin arttırıw maqsetinde qatnasıwshılarǵa keńnen túsinikler berip, «Dárbent gúzarı» kóshesi turǵını E.Niyetovtıń shańaraǵında boldı.
Bul jerde qatnasıwshılar ıssıxanadan nátiyjeli paydalanıw, qıyar hám pomidor nállerin jetistiriw, sonday-aq, qusshılıqtı rawajlandırıw usılları menen tanıstı.
Seminar barısında «Bir máhállede-bir ónim» principi tiykarında eksportqa qolaylı eginlerdi egiw, kámbaǵallıqtan abadanlıqqa erisiw imkaniyatları, puqaralardıń ózin-ózi bánt etiwi hám tarmaqtı rawajlandırıw máseleleri dodalandı.
Seminar qatnasıwshılarınıń keyingi mánzili Erkindárya APJ «Dárbent gúzarı» kóshesi turǵını A.Allaniyazovtıń shańaraǵı boldı.
Bul jerde shańaraq iyesi hám arnawlı qánigeler tárepinen miywe nállerin jetistiriwdiń agrotexnikalıq qaǵıydaları, nállerdi tárbiyalaw usılları, nállerdi egiw múddeti, egiw sxeması hám normaları kórgizbeli túrde túsindirilip, qatnasıwshılar ózleriniń qızıqtırǵan sorawlarına juwap aldı.

Adilbay Orazov,
Qaraqalpaqstan xabar agentligi sholıwshısı