Bıyıl Qaraqalpaqstan Respublikası Konstituciyasınıń qabıl etilgenine 32 jıl toldı. Konstituciya mámlekettiń tiykarǵı nızamı bolıp, hár bir eldiń keleshegin belgileydi. 1993-jıl 9-aprelde qabıl etilgen Qaraqalpaqstan Respublikası Konstituciyası mámleketimizdiń eń joqarı yuridikalıq kúshke iye bolǵan Tiykarǵı nızamı bolıp esaplanadı.

Sáne múnásibeti Ózbekstan mámleketlik kórkem óner hám mádeniyat institutı Nókis filialında ushırasıw bolıp ótti. Oǵan jámiyetlik shólkemlerdiń wákilleri, student-jaslar hám ǵalaba xabar qurallarınıń xızmetkerleri qatnastı. Ilajdı Filial direktorı A.Ayapov kiris sóz benen ashıp, basqarıp bardı.
Dáslep, Ózbekstan hám Qaraqalpaqstan Respublikalarınıń mámleketlik gimnleri jańladı.
Ushırasıwda Qaraqalpaqstan Respublikası Joqarǵı Keńesiniń deputatı A.Tolıbekov, Qaraqalpaqstan Respublikası Sudınıń sudyası E.Uteniyazov hám miynet nuranıyı B.Sultanovlar ilaj qatnasıwshıların bayram menen qutlıqlap, Konstituciyamızdıń xalqımız turmısındaǵı áhmiyeti, mámleketimizde alıp barılıp atırǵan keń kólemli reformalar, jaslar siyasatı hám basqa da áhmiyetli ózgerislerdiń tiykarında Konstituciyanıń tutqan ornı hám áhmiyetin atap ótti.
Konstituciya elimiz puqaralarınıń erk-ıqrarın ózinde sáwlelendiriwshi, insan huqıqları menen erkinliklerin támiyinlewshi, mámleketlik hákimiyat uyımlarınıń xızmetin tártipke salıwshı hám jumıs alıp barıw principlerin belgilewshi eń joqarı yuridikalıq kúshke iye bolǵan Bas nızam esaplanadı.
Keleshek iyeleri bolǵan jaslardı ana Watanǵa sadıqlıq ruwxında tárbiyalawda hám olardıń huqıqıy sanasın asırıwda Konstituciyamızdıń áhmiyetin jaslar qálbine sińdiriwdegi iygilikli jumıslarımızdı jáne de tereńirek dawam ettiriwimiz kerek.
Ilaj student-jaslar tárepinen tayarlanǵan koncert baǵdarlaması menen dawam etti.

Adilbay Orazov,
Qaraqalpaqstan xabar agentligi sholıwshısı