Sońǵı jılları elimizde denetárbiyası hám sporttı hár tárepleme qollap-quwatlaw hám rawajlandırıw, sporttıń barlıq túrlerin, sonıń ishinde, regbidi bunnan bılay da ǵalaba en jaydırıw, sport penen shuǵıllanıw ushın qolaylı sharayatlar hám infrastruktura jaratıwǵa qaratılǵan kompleksli ilajlar ámelge asırıldı.

Nókis qalasında Qaraqalpaqstan Respublikası Sport ministrligi hám Ózbekstan Regbi federaciyası Qaraqalpaqstan bóliminiń baslaması menen trener hám ustazlardıń qatnasıwında aymaqta sporttıń regbi túrin rawajlandırıw, barlıq rayonlarda regbi sport túrin ashıw hám oǵan jaslardı tartıw máselesine baǵıshlanǵan ilaj bolıp ótti.
Ilajda Qaraqalpaqstan Respublikası Sport ministri Erkinbay Qutıbaev hám Ózbekstan Máhálleler associaciyası Qaraqalpaqstan Respublikası basqarması hám Ózbekstan Regbi federaciyası Qaraqalpaqstan bólimi baslıǵı Saǵındıq Turmanovlar shıǵıp sóylep, sońǵı jılları federaciya tárepinen ámelge asırılǵan jumıslar hám qolǵa kirgizilgen tabıslar boyınsha maǵlıwmat berip, tarawda ushırasıp atırǵan kemshiliklerge de toqtap ótildi.
– Regbi – fizikalıq jaqtan kúshli bolǵan jigit-qızlar shuǵıllanatuǵın sport túri. Bul sport túrinen tek ǵana paytaxtımızda emes, al rayonlarda da komandalar qáliplesip atır. Federaciya tárepinen regbidi jaslar arasında keńnen rawajlandırıw maqsetinde ilajlar rejesi islep shıǵılǵan. Regbi mámleketimizde eń qızǵın oynalatuǵın komandalıq oyınlardan birine aylanıwına háreket etemiz, – deydi Ózbekstan Regbi federaciyası Qaraqalpaqstan bóliminiń baslıǵı Saǵındıq Turmanov.
Ilaj dawamında Regbi sport túrin bunnan bılay da rawajlandırıw, onı respublika xalqınıń keń qatlamları arasında keńnen úgit-násiyatlaw hám ǵalaba en jaydırıw, joqarı sapalı oqıw-shınıǵıw procesin támiyinlew, sportshılar, trenerler hám tóreshilerdiń sheberlik dárejesi hám mamanlıǵın turaqlı arttırıp barıw ushın qolaylı sharayatlar jaratıw, sonday-aq, regbi sport túri boyınsha sportshılardı tayarlaw ushın materiallıq-texnikalıq bazanı bekkemlew kólemindegi máseleler dodalandı.

Qaraqalpaqstan xabar agentligi