Ózbekstan Respublikası Prezidenti Shavkat Mirziyoev 3-aprel kúni «Oraylıq Aziya – Evropa Awqamı» birinshi sammitinde qatnasıw ushın Samarqandqa kelgen Túrkmenstan Prezidenti Serdar Berdimuhamedov, Qırǵız Respublikası Prezidenti Sadir Japarov, Tájikstan Prezidenti Emomali Rahmon hám Qazaqstan Prezidenti Qasım-Jomart Toqaev penen ushırasıwlar ótkerdi.

Túrkmenstan Prezidenti mámleketimiz basshısına Túrkmen xalqınıń milliy jetekshisi, Xalıq Másláháti Baslıǵı Gurbanguli Berdimuhamedovtıń qızǵın sálemin jetkerdi.
Ózbekstan menen Túrkmenstan arasındaǵı doslıq, jaqsı qońsıshılıq hám strategiyalıq sheriklik qatnasıqların jáne de rawajlandırıw hám bekkemlew máseleleri kórip shıǵıldı.
Ótken jıldıń juwmaqlarına bola 1,1 milliard dollardan asqan tovar almasıw kórsetkishleri turaqlı ósip atırǵanı úlken qanaatlanıwshılıq penen atap ótildi.
Sanaat, energetika, transport, awıl hám suw xojalıǵı tarawlarında kooperaciya joybarları tabıslı ámelge asırılmaqta. Birgelikte «Shavat-Tashawız» shegaraaldı sawda zonası shólkemlestirilmekte. Jedel aymaqlararalıq sóylesiwler hám mádeniy gumanitarlıq almasıw sheńberindegi ilajlar turaqlı ótkerilmekte.
Bolajaq joqarı dárejedegi eki tárepleme ushırasıwlar hám kóp tárepleme ilajlarǵa tayarlıq kóriw, sonday-aq, keń kólemli birge islesiw boyınsha birgeliktegi joybarlardı ámelge asırıwǵa ayrıqsha itibar qaratıldı.
Ózbekstan hám Tájikstan jetekshileri sóylesiwinde bıyıl 31-mart kúni Xojend qalasında ótken joqarı dárejedegi úsh tárepleme ushırasıwdıń tariyxıy nátiyjeleri úlken qanaatlanıwshılıq penen atap ótildi.
Shegara máseleleriniń tolıq tártipke salınıwı regionallıq birge islesiwdi rawajlandırıwda jańa bet ashatuǵını atap ótildi.
Ózbekstan menen Tájikstan arasındaǵı doslıq, jaqsı qońsıshılıq, strategiyalıq sheriklik hám awqamlaslıq qatnasıqların jáne de bekkemlewdiń áhmiyetli máseleleri kórip shıǵıldı.
Joqarı dárejedegi kelisimlerdi ámelge asırıw máselelerine ayrıqsha itibar qaratıldı.
Usı ayda bolıp ótetuǵın Húkimetleraralıq komissiya májilisinde tovar almasıwdı kóbeytiw hám kooperaciyalıq joybarlardı jedellestiriw boyınsha anıq ilajlardı islep shıǵıw áhmiyetli ekenligi atap ótildi.
Jetekshiler regionallıq kún tártibindegi máselelerdi, sonday-aq, eki hám kóp tárepleme ilajlarǵa tayarlıqtı dodaladı.
Ózbekstan Respublikası Prezidenti Shavkat Mirziyoev hám Qırǵız Respublikası Prezidenti Sadir Japarov ta ushırasıw aldında Xojend qalasında mámleket basshılarınıń úsh tárepleme ushırasıwınıń nátiyjeli bolǵanı hám mámleketlik shegaralardıń tutas noqatı haqqında tariyxıy shártnamaǵa qol qoyılǵanın ayrıqsha qanaatlanıwshılıq penen atap ótti.
Joqarı dárejedegi kelisimlerdi ámelge asırıw máseleleri, atap aytqanda, sanaat, transport, energetika hám infrastruktura tarawlarında áhmiyetli kooperaciyalıq joybarlardı jedellestiriw ilajları kórip shıǵıldı.
Mámleket basshıları jedel aymaqlararalıq baylanıslar hám mádeniy-gumanitarlıq almasıwdı dawam ettiriw zárúr ekenligin atap ótti.
Bolajaq ilajlar rejesi hám regionallıq birge islesiwdiń basqa áhmiyetli máseleleri boyınsha da pikir alısıldı.
Ózbekstan hám Qazaqstan jetekshileriniń ushırasıwında strategiyalıq sheriklik hám awqamlaslıq qatnasıqların eki mámleket basshılarınıń jaqında Almata qalasında bolıp ótken rásmiy emes ushırasıwında erisilgen kelisimlerdi esapqa alǵan halda jáne de rawajlandırıw hám bekkemlewdiń áhmiyetli máseleleri dodalandı.
Eki mámleket húkimetleri tovar almasıwdı kóbeytiw, ekonomikalıq joybarlar hám gumanitarlıq baǵdarlamalardı, sonıń ishinde, aymaqlar dárejesinde ámelge asırıw boyınsha muwapıqlastırılǵan ilajlar kóriwi áhmiyetli ekenligi atap ótildi.
Xalıqaralıq sanaat kooperaciyası orayın iske qosıw procesin tezlestiriw haqqında kelisip alındı.
Sonday-aq, regionallıq kún tártibi boyınsha pikir alısıldı, joqarı dárejedegi ilajlar kestesi kórip shıǵıldı.

ÓzA