Mámleketimizde energiyanı únemlewge erisiwde “jasıl energiya”dan paydalanıw ámeliyatı barǵan sayın keńnen engizilmekte. Mámleketimiz basshısınıń baslamaları menen obektlerde quyash panellerin ornatıw jumısların muwapıqlastırıw wazıypası bajıxana uyımlarına biriktirilgen.

Bul baǵdarda Qaraqalpaqstan Respublikası Bajıxana basqarmasında dúzilgen jumısshı topar wákilleri bul saparı Bozataw rayonında bolıp, mámleketlik uyımlar, sociallıq obektler, isbilermenlik subektleri hám xalıqtıń turaq jaylarına ornatılǵan quyash panelleriniń nátiyjeliligin úyrendi.

Bozataw rayonındaǵı Qusxana taw awıl puqaralar jıyınında jasawshı K.Jaqsıbaeva óziniń úyine 3 kVt. quwatlılıqtaǵı quyash panellerin ornatqan. Shańaraǵındaǵı elektrden paydalanıw ushın jumsalatuǵın qarjılarınıń únemleniwi menen birge, awısqan energiyanı tarmaqqa satıw arqalı qosımsha dáramat ta kórip atırǵanlıǵın atap ótti.

Mámleketimiz basshısınıń tiyisli qararı menen, qayta tikleniwshi energiya derekleri qurılmaların ornatqan hám olardan paydalanıwshı shaxslar, olar paydalanıwǵa tapsırılǵan kúnnen baslap úsh jıl múddetke múlk yamasa jer salıǵı, sonday-aq, artıp qalǵan energiyanı mámleketke satıwdan alınǵan dáramattan payda salıǵınan azat etiliwi de belgilengenin atap ótiw kerek.

Jumısshı topar úyreniwlerin rayondaǵı 20-sanlı balalar muzıka hám kórkem óner mektebine ornatılǵan 10 kVt. quwatlılıqtaǵı, sonday-aq, rayonlıq Medicina birlespesine ornatılǵan 30 kVt. quwatlılıqtaǵı quyash panelleriniń jaǵdayı hám nátiyjeliligin úyreniw menen dawam ettirdi.

Maǵlıwmat ushın, usı kúnge shekem Qaraqalpaqstan Respublikasında jámi 1980 isbilermenlik subektlerine 21,2 MVt. (megavatt), 5190 xojalıqqa 16,7 MVt. quwatlılıqtaǵı, 1144 sociallıq obekt hám mámleketlik uyımlarǵa 15,7 MVt. quwatlılıqtaǵı quyash panelleri ornatılǵan.

Á.Jiyemuratov,

Qaraqalpaqstan xabar agentligi