Braziliyanıń Fos-du-Iguasu qalasında ótkerilip atırǵan boks boyınsha jáhán kubogi jarısında bes salmaq kategoriyası boyınsha yarım final bellesiwleri bolıp ótti.

Usı bellesiwler sheńberinde Parij-2024 Olimpiadasınıń qatnasıwshısı -90 kg salmaqta Twrabek Habibullaev hindstanlı Vishaldı, +90 kg da Jahongir Zokirov qazaqstanlı Daniyal Saparbaydı, -50 kg da Asilbek Jalilov hindstanlı Jadumani Mandengbamdı, -75 kg da Fazliddin Erkinboev polshalı Mixal Yarlinskidi jeńip final jollamasın qolǵa kirgizdi.
Al, qaraqalpaqstanlı jas boksshi Madiyar Daniyarov bolsa, -60 kg salmaqta maydan iyesi esaplanǵan Luis Oliveyraǵa jeńilip qalıp, qola medalın qolǵa kirgizdi.
Álbette, bul jas boksshimizdiń xalıqaralıq arenadaǵı dáslepki jarısı. Sonlıqtan Madiyardıń yarım finaldaǵı jeńilisine qapa bolıwǵa bolmaydı. Sebebi, onıń qolǵa kirgizgen qola medalı Qaraqalpaqstan boksi tariyxındaǵı tuńǵısh medal bolıp tabıladı. Sonlıqtan jerlesimizdi hám onıń trenerlerin bul jetiskenligi menen qızǵın qutlıqlaymız.
-Madiyardıń bul tabısı respublikamızdıń barlıq boks jankúyerlerin quwanıshqa bóledi,-deydi tájiriybeli trener Rashid Seytov.-Sebebi, respublikamız boksshileri eresekler arasında kóp jıllardan berli xalıqaralıq jarıslarda bunday tabısqa erisken joq edik. Bul jas boksshilerimiz ushın úlken motivaciya boldı. Aldaǵı waqıtları Madiyar hám basqa da boksshilerimizden jańa jeńislerdi kútip qalamız.

Adilbay Orazov,
Qaraqalpaqstan xabar agentligi sholıwshısı