Taxtakópir rayonındaǵı «Pishenlik-Taxta» fermer xojalıǵında shigit egisine baǵıshlanǵan kórgizbeli seminar bolıp ótti.

Seminarda Qaraqalpaqstan Respublikası Joqarǵı Keńesiniń komitet baslıǵı A.Jumanazarov, Qaraqalpaqstan Respublikası Ministrler Keńesi Baslıǵınıń awıl hám suw xojalıǵı máseleleri boyınsha orınbasarı Sh.Teshaev, rayon hákimi J.Adilov hám tarawǵa juwapker shólkemler, paxta klasteri hám fermer xojalıqları basshıları qatnastı.
Seminar dawamında shıǵıp sóylewshiler tárepinen shigit egisiniń sapalı usılları hám fermer xojalıqları itibar qaratıwı kerek bolǵan áhmiyetli wazıypalarǵa toqtap ótip, olardıń aldaǵı islerine tabıslar tiledi.
-Bıyıl 40 gektar jerge shigit egiwdi rejelestirgenbiz,-deydi Qılıshbek Utebaev.-Sonnan 21 gektar jerge paxtanıń qıtay texnologiyası sortınan, 19 gektar maydanǵa S-4727 cortın egemiz.
Bunnan soń, jaqsı niyetler menen atızlarǵa dáslepki tuqımlar taslanıp, rayonda egis jumısları baslap jiberildi.
Maǵlıwmat ushın aytatuǵın bolsaq, bıyılǵı jılı Taxtakópir rayonı boyınsha jámi 3 mıń 600 gektar maydanǵa shigit egiw rejelestirilgen bolıp, bul jumıslardı shólkemleskenlik penen alıp barıw ushın 7 otryad dúzilip, olarǵa 610 texnika hám 89 texnikalık xızmetkerler biriktirilgen.
Sonnan 1610 gektar maydanǵa qıtay texnologiyası sortı, 1990 gektar maydanǵa S-4727 cortları egiw rejelestirilgen.

Adilbay Orazov,
Qaraqalpaqstan xabar agentligi sholıwshısı.