Bıyıl Qaraqalpaqstan Respublikası Konstitu¬ciyası qabıl etilgenligine 32 jıl toladı. Ótken dáwir ishinde respublikamızdıń barlıq tarawlarında ózgerisler júz berip, úlken reformalar ámelge asırıldı. Álbette, bul ámelge asırıl¬ǵan ilajlardıń huqıqıy tiykarı Qaraqalpaqstan Respublikası Kons¬tituciyası bolıp esaplanadı. Konstituciya – xal¬qımızdıń siyasiy-huqıqıy kózqarasınıń joqarı kórinisi. Ol puqaralarǵa ǵárezsiz, erkin hám azat, tınısh hám tatıw jasawdıń nızamlı kepili bolıp xızmet etip kelmekte. Konstituciya tiykarında mámleketimizdiń milliy nızamshılıq sisteması, mámleketlik uyımlar, puqaralıq jámiyeti institutları shólkemlestirildi.

Ózbekstan Respublikası Prezidentiniń 2017-jıl 7-fevral kúngi bes jılǵa mólsherlengen Ózbekstan Respublikasın bunnan bılay da rawajlandırıw bo¬yınsha Háreketler strategiyası haqqındaǵı Pármanı qabıl etilgennen soń Ózbekstan hám Qaraqalpaqstan Respublikası Konstituciyalarına ózgeris hám qosımshalar kirgizildi. Bul hújjet házirgi waqıtta turmısqa izbe-iz engizilmekte.
Búgingi kúnde elimizde alıp barılıp atırǵan reformalardıń nátiyjesi eń aldı menen joqarı mánawiyatlı, erkin pikirleytuǵın, elimizdiń táǵdiri hám keleshegi ushın juwapkershilikti óz moynına alıwǵa tayar jas kadrlar sanın kóbeytiw hám jaslardıń bilimin jetilistiriw menen tikkeley baylanıslı. Bunday kadrlardı tayarlawda Konstituciyamızdıń ornı hám áhmiyeti úlken, sebebi, ámeldegi nızamlar hám nızamnan kelip shıǵatuǵın hújjetler sol Konstituciya tiykarında qabıl etilip, jaslarımız ushın imkaniyatlar hám qolaylılıqlar jaratılıp atır.
Tiykarǵı Nızam jaslardıń keleshegin jáne de bekkem qurıwda tayanısh bolıp, onda jazılǵan hár bir sóz júdá qádirli hám áhmiyetli esaplanadı. Ol puqaralardıń miynet etiw, erkin kásip tańlaw, ádil miynet sharayatlarında jumıs islew hám nızamda kórsetilgen tártipte jumıssızlıqtan qorǵanıw huqıqın beredi. Konstituciyada huqıq hám erkinligimiz, puqaralıq minnetlerimiz nızam jolı menen kepillengen. Atap aytqanda, onıń 39-statyasında hám bir insan bilim alıw huqıqına iye bolıp, biypul ulıwma bilim alıwǵa mámleket tárepinen kepillik beriledi. Mektep isi mámlekettiń baqlawında boladı dep belgilengen bolsa, 40-statyasında hár kimge ilimiy-texnikalıq dóretiwshilik erkinligi, mádeniy jetiskenliklerden paydalanıw huqıqı kepillenedi. Mámleket jámiyettiń mádeniy, ilimiy hám texnikalıq rawajlanıwına ǵamqorlıq etedi, dep kórsetilgen. Jaslardıń jámiyetlik turmısınıń túrli tarawlarındaǵı bul huqıqları Konstituciya tiykarında qabıl etilgen kóplegen nızamlar hám nızamnan kelip shıǵatuǵın hújjetler menen támiyinlenedi. «Bilimlendiriw haqqında»ǵı Nızam, Kadrlar tayarlawdıń milliy baǵdarlaması, «Bala huqıqlarınıń kepillikleri haqqında»ǵı, «Jaslarǵa baylanıslı mámleketlik siyasat haqqında»ǵı Nızamlar solardıń qatarına kiredi.
Prezidentimiz Sh.Mirziyoev óziniń shıǵıp sóylewleriniń birinde mámleketimiz keleshegi bolǵan jaslarǵa qarata «Ullı keleshek búginnen baslanadı» dep isenim bildirgen edi. Sonıń ushın da, elimiz jasları Prezidentimizdiń, xalqımızdıń isenimin aqlap, mámleketimiz tárepinen jaratılıp berilip atırǵan sharayatlardan tolıq paydalanıp, ózleriniń kúsh-jigerin, bilimin ayanbay Watanımızdıń rawajlanıwına, onıń dúnya jámiyetshiligindegi ornın ele de bekkemlewge jumsawı kerek. Bunıń ushın jaslardı sociallıq qollap-quwatlaw, onıń huqıq hám máplerin qorǵaw boyınsha kóp tárepleme birge islesiwdi jáne de rawajlandırıw zárúr.
Juwmaqlastırıp ayt¬qanda, mámleketimizde ámelge asırılıp atırǵan reformalardıń huqıqıy tiykarı Konstituciya bolıp esaplanar eken, onı qádirlewimiz hám talaplarına tolıq ámel etiwimiz kerek.

M.TURAQBAEV,
Nókis qalası Ádillik bólimi Mámleketlik xızmetler orayınıń bas qánigesi.
Qaraqalpaqstan xabar agentligi