Mámleketimiz basshısınıń baslamaları tiykarında uyımlardıń basshıları máhállelerde kem támiyinlengen shańaraqlardıń sharayatların jaqsılaw boyınsha ekonomikalıq-sociallıq ilajlarǵa juwapker etip belgilengen.

Qaraqalpaqstan Respublikası Bajıxana basqarması baslıǵınıń orınbasarı N.Nazarbaev Ámiwdárya rayonınan biriktirilgen 5 shańaraqta bolıp, tiyisli juwapkerlerdiń qatnasıwında rayondaǵı “Kámbaǵallıqtan – abadanlıqqa qaray” principi boyınsha kámbaǵallıq dárejesin azaytıw hám jańa jumıs orınların jaratıw jumısları hár tárepleme tallanıp, úyrenildi.
Rayondaǵı Jayhun awıl puqaralar jıyını juwapkerleri menen birgelikte kem támiyinlengen shańaraqlardıń jaǵdayınan xabar alınıp, olardıń jasaw sharayatları úyrenildi. Puqaralar menen sáwbetlesip, kásip ónerge qábileti hám imkaniyatları menen qızıqtı.
Bul máhállede jasawshı jámi 2510 puqara sociallıq qorǵaw reestrine kirgizilgen bolıp, usı kúnge shekem 15 puqara kásip-ónerge úyretilip, tigiwshilik hám toqıwshılıq kurslarında oqıtılǵan.
Bul baǵdardaǵı jumıslar dawam etpekte.

Á.Jiyemuratov,
Qaraqalpaqstan xabar agentligi.