Kegeyli rayonında óz isbilermenligin rawajlandırıp atırǵan belsendi hayal-qızlardıń jumısı menen jaqınnan tanısıw maqsetinde “Búgingi kúnniń isbilermen hayalı” joybarı sheńberinde sheberlik sabaǵı shólkemlestirildi.

Onda Qaraqalpaqstan Respublikası Joqarǵı Keńesiniń deputatı N.Ametova, Xalıq deputatları Kegeyli rayonlıq Keńesiniń deputatı B.Iskenderov, ÓzLiDeP rayonlıq Keńesiniń apparat baslıǵı P.Bayjanov hám hayal-qızlar qatnastı.
Ilaj dawamında hayal-qızlardı jumısqa jaylastırıw, olarǵa jeńilletilgen kreditler ajıratıw, isbilermenlik jumısın qollap-quwatlaw maqsetinde imarat qurıw ushın jer uchastkası ajıratılıwına jaqınnan járdem beriw sıyaqlı pikir-usınıslar ortaǵa taslandı.
– Isbilermenlik jumısımdı 2014-jılı 1 jumısshı menen baslaǵan bolsam, búgingi kúnde olardıń sanı 10 nan aslam bolıp, rayonda hayal-qızlar hám er adamlar ushın gózzallıq salonı hám tigiwshilik cexınıń jumısın alıp barmaqtamız. Prezidentimizdiń baslaması menen jaratılǵan imkaniyatlar sheńberinde isbilermenlik jumısımdı keńeytiw hám jumısshılardıń sanın 50 ge kóbeytiwdi rejelestirgenmen, – deydi isbilermen N.Tilewmuratova.
Ilaj dawamında qatnasıwshılar Nazira Tilewmuratovanıń gózzallıq salonı hám tigiw cexında bolıp, onda jaratılǵan imkaniyatlar menen jaqınnan tanıstı.
Ilaj sońında rayondaǵı bir qatar isbilermen hayal-qızlarǵa partiyanıń estelik sawǵaları tapsırıldı.

Qaraqalpaqstan xabar agentligi