Ózbekstanlı hayal-qızlardıń isbilermenlik tarawındaǵı iskerligin xoshametlew, qábiletin júzege shıǵarıw, basshılıq jetiskenliklerin ǵalaba en jaydırıw, biyǵárez biznes ashıw baǵdarındaǵı sociallıq baslamaların qollap-quwatlawǵa kómeklesetuǵın “Isbilermen hayal” tańlawına respublikamız boylap start berildi.

ÓzLiDePtiń eń iri joybarlarınan bolǵan bul tańlawdıń dáslepki basqıshları házirgi waqıtlarda máhállelerde bolıp ótpekte.

Taqıyatas rayonı Doslıq máhállesinde usı tańlawdıń máhálle basqıshı bolıp ótti.
Tańlawdı ótkeriwden tiykarǵı maqset, mámleketimizde ámelge asırılıp atırǵan sociallıq-ekonomikalıq reformalar, siyasiy processlerdiń mazmun-mánisin hayal-qızlar arasında keńirek úgit-násiyatlaw, – deydi ÓzLiDeP Taqıyatas rayonlıq keńesiniń apparat baslıǵı Quwanıshbay Aymuratov. – Sonıń menen birge, kishi biznes hám jeke isbilermenlikti rawajlandırıwǵa múnásip úles qosıp atırǵan hayal-qızlarımızdı xoshametlew de názerde tutılǵan. Ilaj sheńberinde respublikanıń eń shetki awıllarına shekemgi aymaqlardaǵı hayal-qızlardıń bántligin támiyinlew, olardıń arasında shańaraqlıq isbilermenlikti rawajlandırıwdı jańa basqıshqa alıp shıǵıwǵa ayrıqsha áhmiyet qaratılmaqta.
Tańlaw sheńberinde ótkerilgen ushırasıwda hayal-qızlardı qollap-quwatlaw, olardı óndiriske tartıw baǵdarında ámelge asırılıp atırǵan joybarlar haqqında da sóz boldı. Ásirese, usı jıldıń 19-mart kúni mámleketimiz basshısı isbilermenler menen sáwbetinde tarawda hayal-qızlar ushın úlken imkaniyatlar esigin ashqanın atap ótti.
Tańlawda usı máhállede 2011-jıldan berli tigiwshilik penen shuǵıllanıp kiyatırǵan jeke tártiptegi isbilermen Gúlsinay Atamuratovanıń jumısı tóreshiler tárepinen joqarı bahalandı. Ol házirgi waqıtta “Hayal-qızlar dápteri”ndegi 5 awıllasın jumıs penen támiyinlegen.
Jeńimpazǵa partiyanıń diplom hám estelik sawǵaları tapsırıldı.

Qaraqalpaqstan xabar agentligi