Qaraózek rayonında Prezidentimizdiń baslaması menen aymaqtı sociallıq-ekonomikalıq jaqtan rawajlandırıwǵa qáwender sıpatında biriktirilgen Namangan wálayatı hákimligi tárepinen kóplegen unamlı jumıslar ámelge asırılmaqta.

Namangan wálayatı hákimi Shavkat Abdurazzoqov Qaraqalpaqstan Respublikası Ministrler Keńesiniń Baslıǵı Farhod Ermanov penen birgelikte Qaraózek rayonında sońǵı waqıtları wálayat hákimligi tárepinen ámelge asırılıp atırǵan jumıslardıń barısı menen tanısıw, aymaq xalqı menen pikirlesiw maqsetinde, usı aymaqqa bardı.
Eń dáslep olar rayonda «Jasıl mákan» ulıwma milliy joybarı sheńberinde 3 gektar maydanda shólkemlestirilip atırǵan «Namangan baǵı»na terek nállerin egiw ilajına qatnastı.
Bunnan soń delegaciya aǵzaları Namangan wálayatı hákimligi qáwenderliginde Qaraózek APJ «Qaramoyın» awılında 80 orınǵa mólsherlenip qurılǵan 18-sanlı mektepke shekemgi bilimlendiriw shólkeminde balalar hám pedagog-xızmetkerler ushın jaratılǵan sharayatlar menen tanıstı.
Sońınan miymanlar namanganlı investorlar tárepinen Esim MPJ aymaǵında qurılıp atırǵan «Yuksak sanoat metall» JShJ da bolıp, búgingi kúni kárxanada alıp barılıp atırǵan qurılıs jumıslarınıń barısı menen tanısıp, jámiyet basshıları hám
qurılısshılar menen sáwbetlesti.
Maǵlıwmat ushın aytatuǵın bolsaq, rayonda boy tiklep atırǵan kárxananıń joybar bahası 5,5 mln dollar bolıp, ol jılına 24,4 mıń tonna ónim islep shıǵaradı hám 50 jańa jumıs orınları jaratıladı.
Bunnan soń delegaciya aǵzaları Qutlı mákan MPJ da bolıp, aymaq xalqı menen ushırasıp, olardı qıynap atırǵan mashqalalar tuwralı sáwbetlesti.
Xızmet saparı dawamında Namangan wálayatı hákimi Shavkat Abdurazzoqov Qaraqalpaqstan Respublikası Ministrler Keńesiniń Baslıǵı Farhod Ermanov penen birgelikte rayonlıq Mádeniyat sarayında rayonlıq keńes deputatları, máhálle jetiligi hám aymaq belsendileri menen ushırasıp, rayondı ele de rawajlandırıw boyınsha olardıń usınıs hám pikirlerin tıńladı.

Qaraqalpaqstan xabar agentligi