Shımbay rayonında usı jıldıń zúrááti ushın shigit egisi mapazı baslanıwına baylanıslı kórgizbeli seminar ótkerildi.

Onda Qaraqalpaqstan Respublikası Ministrler Keńesi Baslıǵınıń awıl hám suw xojalıǵı máseleleri boyınsha orınbasarı Sh.Teshaev, Shımbay, Qaraózek, Taxtakópir, Kegeyli, Nókis rayonlarınıń hákimleri, tarawǵa juwapker shólkemler, paxta klasterleri hám fermer xojalıqları basshılarınıń qatnastı.

Seminar dawamında shıǵıp sóylewshiler tárepinen mámleketimizde Prezidentimiz tárepinen awıl xojalıǵın rawajlandırıwǵa qaratılıp atırǵan itibar hám jaratılǵan keń imkaniyatlar haqqında keń túrde atap ótildi. Sonday-aq, shigit egiwdiń sapalı usılları hám fermer xojalıqları itibar qaratıwı kerek bolǵan áhmiyetli wazıypalar sóz etildi.

-Bıyıl rayonımız boyınsha 5500 gektar jerge klimat sharayatımızǵa beyimlesken paxtanıń «S-4727», «Shımbay-5018» sortların egiwdi rejelestirgenbiz, -deydi Shımbay rayonı awıl xojalıǵı bóliminiń baslıǵı Ilham Allambergenov.-Egisti tez hám sapalı juwmaqlaw maqsetinde, aymaqlarda 9 otryad dúzilip, olarǵa zamanagóy arnawlı texnika hám agregatlar, tájiriybeli mexanizatorlar qatnastırılmaqta.

Ilaj dawamında seminar shólkemlestiriwshileri hám aymaq jası úlkenleri tárepinen jaqsı niyetler menen atızlarǵa dáslepki tuqımlar taslanıp, rayonda egis jumısları baslap jiberildi.

Adilbay Orazov,

Qaraqalpaqstan xabar agentligi sholıwshısı