Moynaq rayonı Mádeniyat úyinde rayon jaslarınıń qatnasıwında múddetli áskeriy xızmetti ótep bolǵan áskerlerge usınısnamalar beriw saltanatı ótkerildi.

Ilajǵa rayon hákimi B.Menglibekov hám arnawlı injenerlik-qurılıs basqarması áskeriy bólimi qánigelestirilgen tábiyattı tiklew batalonı komandiri, kapitan M.Karimovlar qatnastı.
Hákim B.Menglibekov múddetli áskeriy xızmetti ótep bolǵan áskerlerge Moynaq rayonında áskeriy xızmetti ótew dáwirinde iyelegen bilim hám kónlikpeleri aldaǵı turmısında bekkem tiykar bolıp xızmet etiwine tilekleslik bildirdi.
Bul usınısnamalar Ózbekstan Respublikası Prezidentiniń arnawlı qararına muwapıq múddetli áskeriy xızmetti ótep bolǵan áskerlerdiń respublikamızdıń barlıq joqarı oqıw orınlarına bakalavriatqa oqıwǵa kiriwinde test sınaqları nátiyjelerine jeńillikler beriliwine tiykar boladı.
Ilaj bayram keshesine aylanıp, koncert baǵdarlaması menen dawam etti.

Qaraqalpaqstan xabar agentligi