Elimizde sociallıq qorǵawdı máhálle dárejesinde shólkemlestiriw, sociallıq xızmet hám járdemlerdi kompleksli qatnas tiykarında kórsetiw, xalıqtıń awır sociallıq jaǵdayǵa túsip qalıwınıń aldın alıw, sonday-aq, sociallıq qorǵawdıń mánzilliligin hám nátiyjeliligin arttırıw jáne xalıqtıń járdemge mútáj qatlamı jaǵdayınıń jaqsılanıwın támiyinlew maqsetinde Ózbekstan Respublikası Prezidenti janındaǵı Sociallıq qorǵaw milliy agentliginiń “Insan” sociallıq xızmetler oraylarınıń sociallıq xızmetkerler toparları tárepinen sociallıq xızmetler hám járdemler kórsetiwdiń jańa sisteması jolǵa qoyılǵan.

Olar tárepinen awır jaǵdayǵa túsip qalǵan hám awır jaǵdayǵa túsip qalıw qáwpi joqarı bolǵan shaxslar hám shańaraqlarǵa qalıs járdem kórsetilip, bir qatar mashqalalarınıń sheshiliwinde unamlı nátiyjesin bermekte.
Shomanay rayonı “Insan” sociallıq xızmetler orayınıń kompleksli sociallıq xızmet kórsetiwshi qánigesi Qalbay Isakov tárepinen rayondaǵı Diyqanabad awıl puqaralar jıyını aymaǵındaǵı jalǵız jasawshı puqaralardan xabar alıp, qıytaq jerlerine egin egiw, abadanlastırıw hám terek nállerin otırǵızıw jumısları shólkemlestirildi.
Atap aytqanda, “Insan” orayınıń xızmetkerleri hám máhálle belsendileri birgelikte jalǵız jasawshı puqaralarǵa járdem berip, olardıń háwlisin tazalaw, terek nállerin otırǵızıw hám gúl egiw jumısların alıp bardı.
Olar tárepinen alıp barılıp atırǵan bunday jumıslar jalǵız jasawshı puqaralardıń turmısın jaqsılawǵa, olarǵa miyrim-shápáát hám ǵamqorlıq kórsetiwge qaratılǵanı menen áhmiyetli. Bul olardıń ómirlerine quwanısh alıp kiriwge xızmet etedi.
Diyqanabad awıl puqaralar jıyını turǵınları Q.Isakov hám “Insan” orayı xızmetkerlerine minnetdarshılıq bildirdi.
Álbette, usınday baslamalar jámiyetimizde insanıylıq hám miyrim-shápáát ruwxın bekkemlewge xızmet etedi.

Qaraqalpaqstan xabar agentligi