Ájiniyaz atındaǵı Nókis mámleketlik pedagogikalıq institutında búgin erte tańnan professor-oqıtıwshılar hám student-jaslardıń qatnasıwında azanǵı dene shınıqtırıw ilajı shólkemlestirildi,-dep xabar bermekte, instituttıń baspasóz xatkeri I.Mátekov.

Shınında da, insan óz imkaniyatlarınan kelip shıǵıp, sport penen shuǵıllanıp, denesin shınıqtırıp tursa densawlıǵı ushın oǵada paydalı esaplanadı. Ásirese, hár kúni azanda 15-20 minutlıq dene shınıǵıwı yamasa 40-60 minut dawamında ashıq hawada piyada júriw oǵada paydalı.
Sońǵı jıllarda elimizde xalqımız arasında salamat turmıs tárizin engiziw, ǵalabalıq sporttı keń túrde úgit-násiyatlaw máselesi mámleketlik siyasat dárejesine kóterilip, fizikalıq jaqtan jetik, salamat áwladtı tárbiyalaw baǵdarında nátiyjeli jumıslar ámelge asırılmaqta.
Ózbekstan Respublikasınıń «Dene tárbiya hám sport haqqında»ǵı Nızamı hám Ministrler Kabinetiniń «Ózbekstanda dene tárbiya hám sporttı bunnan bılay da rawajlandırıw ilajları haqqında»ǵı qararında belgilengen wazıypalardan kelip shıǵıp ótkerilgen ilajǵa institut professor-oqıtıwshıları hám student-jaslarınan ibarat 1000 ǵa shamalas adam qatnastı.
Atap ótilgenindey, Ullı babamız Ábiw Áli ibn Sinanıń: «Dene shınıqtırıw – densawlıqtı saqlawda nátiyjeli usıl esaplanadı» degen hikmeti hár birimizdiń ómirdegi uranımızǵa aylansa ǵana keleshek áwladlarımızdıń kámil insan bolıwına tiykar jaratqan bolamız.
Institutta jaqında paydalanıwǵa tapsırılǵan zamanagóy sport kompleksi hám úlken sport maydanı usı maqsetlerge erisiw ushın tiykarǵı baza bolıp xızmet etpekte.
Institutta ǵalabalıq sport ilajları dawam etpekte.

Qaraqalpaqstan xabar agentligi.