Mal sharwashılıǵın rawajlandırıwda ot-jem bazasınıń tutqan ornı ayrıqsha. Ásirese, Qaraqalpaqstan sharayatında jońıshqa daqılın egip, onı jetistiriw oǵada paydalı bolıp esaplanadı. Sonlıqtan sońǵı jılları elimizde jońıshqashılıqtı ele de rawajlandırıw hám usı arqalı mal sharwashılıǵı ushın bekkem ot-jem bazasın jaratıwǵa ayrıqsha itibar qaratılmaqta.

Mal sharwashlıǵına qánigelesken Bozataw rayonındaǵı «Tilewnazar Maxsım» juwapkershiligi sheklengen jámiyetiniń jer maydanında jońıshqa egiw boyınsha kórgizbeli seminar bolıp ótti.
Kórgizbeli seminarǵa rayon hákimi B.Ubbiniyazov, respublikadan biriktirilgen wákiller hám rayondaǵı sharwashılıq fermer xojalıqları hám awıl xojalıǵı kárxanaları basshıları qatnastı.
Seminarda rayon hákimi B.Ubbiniyazov hám basqalar jońıshqa tuqımın egiw texnologiyası, egislik maydanları, oǵan qatnasatuǵın texnikalar hám agregatlardan nátiyjeli paydalanıw boyınsha keń túrde túsinikler berdi.
-Bıyıl 30 gektar jerge jońıshqa egiwdi rejelestirgenbiz,- deydi «Tilewnazar Maxsım» juwapkershiligi sheklengen jámiyetiniń baslıǵı Aqnazar Seytbekov.-Bul ósimlikti kúnniń salqın gezleri ekpeseń, ıssı da kúyip ketedi. Sonlıqtan jámiyetimiz aǵzaları menen báhárdiń usınday qolaylı kúnlerinen ónimli paydalanıwǵa háreket etip atırmız. Nesip etse, tez arada jońıshqanı sapalı egiw jumısların juwmaqlaymız. Bunıń ushın bizde barlıq imkaniyat hám múmkinshilikler bar.
Sońınan seminar qatnasıwshıları jońıshqa egiw ushın tayarlanǵan jer maydanına jaqsı niyetler menen tuqım tasladı.

Adilbay Orazov,
Qaraqalpaqstan xabar agentligi sholıwshısı.