Shımbay rayonı Mádeniyat bóliminde rayon aymaǵındagi awıl hám máhálle puqaralar jıyınları arasında «Hayal-qádiriyatlar dawamshısı» atamasındaǵı tańlawdıń rayonlıq basqıshı bolıp ótti.

Tańlawdı rayon hákiminiń orınbasarı, Shańaraq hám hayal-qızlar bólimi baslıǵı G.Mambetniyazova kiris sóz benen ashıp, hayal-qızlardıń jámiyetimizdegi belsendiligi, gender teńlik máseleleri haqqında keń túrde aytıp ótti.
Ótkerilgen tańlawda qatnasıwshılar belgilengen 3 shárt tiykarında óz-ara bellesip, olardıń sheberlikleri tájiriybeli tóreshiler tárepinen múnásip bahalanıp barıldı.
Onda qatnasıwshı hayal-qızlar xalqımızdıń milliy úrp-ádet hám salt-dástúrlerin, olardıń tárbiyalıq áhmiyetin kórsetken halda óz sheberliklerin jıynalǵanlardıń itibarına usındı hám tamashagóylerdiń alǵısına miyasar boldı
-Awılımızda dúzilgen Qızılózek hayal-qızlar ónerment toparı menen birgelikte, háwjar, besik jırı, milliy taǵamlarımız hám buyımlarımızdıń tayarlanıw usılların ilaj qatnasıwshıları názerine usınıp, tańlawda birinshi orındı iyelewge miyasar boldıq,-deydi Qızılózek awıl puqaralar jıyını hayal-qızlar belsendisi Elza Abdijamilova .
Tańlawda qatnasqan jámáátler rayon hákimliginiń arnawlı diplom hám sawǵaları menen sıylıqlanıp, jeńimpaz dep tabılǵan Qızılózek awıl puqaralar jıyını hayal-qızlar jámááti tańlawdıń Qaraqalpaqstan Respublikası basqıshına jollamanı qolǵa kirgiziwge miyasar boldı.

Adilbay Orazov,
Qaraqalpaqstan xabar agentligi sholıwshısı