Prezidentimiz tárepinen qaraqalpaqstanlı isbilermenlerge jaratılıp atırǵan imkaniyatlar tiykarında Xojeli rayonında óz isbilermenligin rawajlandırıp atırǵan belsendi isbilermenlerdiń jumısları menen jaqınnan tanıstırıw maqsetinde Ózbekstan Sawda-sanaat palatası Qaraqalpaqstan Respublikası basqarması tárepinen ǵalaba xabar qurallarınıń wákilleri ushın press-tur shólkemlestirildi.

Dáslep qatnasıwshılar rayonda jumıs alıp barıwshı ónerment Azamat Izbergenovtıń shańaraǵında bolıp, onıń jumısları menen jaqınnan tanıstı. A.Izbergenov 20 jıldan aslam waqıttan berli aǵashtan ónermentshilik hám tutınıw buyımların soǵıw menen shuǵıllanadı. Ónerment tárepinen tayarlanǵan besik, adaq arba, balalar atkónshegi hám basqa da buyımlarǵa qızıǵıwshılıq bildirgen qarıydarlar sanı kún sayın artıp atır.
A.Izbergenov ómirlik joldası menen birgelikte respublikamızda shólkemlestirilgen bir qatar ónermentshilik boyınsha ótkerilgen kórgizbe-yarmarkalarına belsene katnasıp kelmekte.
Bunnan soń ǵalaba xabar qurallarınıń wákilleri «Cake Bumer» brendiniń tiykarın salıwshısı, isbilermen Maxira Mamutovanıń jumısları hám kárxanasında jaratılǵan imkaniyatlar menen jaqınnan tanıstı.
«Cake Bumer» shańaraqlıq kárxanası óz jumısın 2007-jıldan baslaǵan bolıp, konditer ónimlerin tayarlaw menen shuǵıllanadı. Dáslep 1 jumısshı menen óz jumısın baslaǵan bul kárxanada búgingi kúnde 100 den aslam puqaranıń turaqlı bántligi támiyinlengen. Sonnan 30 dan aslamı migraciyadan qaytqan puqaralar bolsa, 80 % ti hayal-qızlardı quraydı. Sonday-aq, kárxananıń Nókis qalası hám Qońırat rayonlarında filialları bolıp, mazalı konditer ónimlerin islep shıǵarıw hám sapalı xızmet kórsetiw menen shuǵıllanbaqta.
Isbilermen M.Mamutovaǵa Prezidentimizdiń arnawlı pármanı negizinde Xojeli rayonı orayınan investiciya kirgiziw shárti menen tikkeley jer orını ajıratıp berildi. Usınday jeńillik nátiyjesinde «Cake Bumer» shańaraqlıq kárxanasınıń jumısları jáne de keńeyip, aldaǵı waqıtta qosımsha 50 den aslam jaslar hám hayal-qızlardıń turaqlı bántligi támiyinleniwi rejelestirilgen.
Press-tur dawamında jurnalistler kárxanadaǵı óndirislik jumıslar hám elimizde isbilermenlerge jaratılǵan sharayatlardıń tikkeley gúwası boldı. Qánigelerden ózlerin qızıqtırǵan sorawlarına hár tárepleme, tolıq juwap aldı.

Qaraqalpaqstan xabar agentligi.