Nókis qalasındaǵı Doslıq kanalı boyında Xalıqlar doslıǵı bayramı ótkerildi.

Ilajda Qaraqalpaqstan Respublikası Joqarǵı Keńesiniń Baslıǵı Amanbay Orınbaev shıǵıp sóylep, jıynalǵanlardı elimizde keń túrde dawam etip atırǵan «Nawrız» áyyyamı, múbárek Ramazan hayıtı hám búgingi awızbirishilik, doslıq bayramı menen qızǵın qutlıqladı.
Búgingi kúnde elimizde húrmetli Prezidentimizdiń basshılıǵında milletleraralıq tatıwlıqtı bekkemlewge, xalıqlar arasında óz-ara awızbirshilikti támiyinlewge, olardıń arasında keńpeyillik hám miyrim-shápáát ortalıǵın jáne de kúsheytiwge ayrıqsha itibar qaratılıp, bul baǵdarda keń kólemli ilajlar ámelge asırılıp atırǵanın atap ótiw kerek.
Tájikstannıń Xojend qalasında Ózbekstan, Qırǵızstan hám Tájikstan Prezidentlariniń qatnasıwındaǵı tariyxta tuńǵısh márte úsh tárepleme ótkerilgen sammit bunıń ayqın dáliyli bola aladı. Álbette, bul sammit qońsılas mámleketler menen regionallıq sheriklikti bekkemlewge áhmiyetli qádem bolıp, Oraylıq Aziyada qáwipsizlik, turaqlılıq hám abadan turmıstı támiyinlewge xızmet etedi.
Sonı ayrıqsha atap ótiwimiz kerek, búgingi kúni elimizde túrli millet hám xalıq wákilleri tatıwlıqta jasap, mámleketimizdiń rawajlanıwı jolında óziniń múnásip úleslerin qosıp kelmekte. Xojendte ótkerilgen sammit penen únles ótkerilgen Doslıq bayramı áne, usınday doslıq hám awızbirshilikti bunnan bılay da bekkemlewge xızmet etedi.
Maǵlıwmat ushın aytıp ótetuǵın bolsaq, házirgi waqıtta respublikamızda rus, ukrain, qazaq hám túrkmen milliy mádeniy orayları menen bir qatarda koreysler associaciyasınıń jumısı jolǵa qoyılǵan.
Kóp milletli xalqımız bir maqset, bir ideya jolında birlesip, elimizdi rawajlandırıw jolında nátiyjeli miynet etip kelmekte.
Ótkerilgen bayram saltanatında kórkem óner hám mádeniyat xızmetkerleriniń atqarıwında xalıqlar doslıǵın jırlawshı koncert baǵdarlaması ilaj qatnasıwshıları názerine usınılıp, bul ilajǵa kóterińki keypiyat baǵıshladı.

Qaraqalpaqstan xabar agentligi