Jıldaǵıday Ájiniyaz atındaǵı Nókis mámleketlik pedagogikalıq institutındaǵı «Nawrız»ǵa baǵıshlanǵan ilajlar keminde bir-eki kún dawam etedi. Bıyılǵı bayram ilajları da súmelek seyili menen baslandı. 27-mart kúni instituttıń 1-sanlı studentler turaq jayı aldında «Nawrız» ulıwma xalıqlıq bayramı múnásibeti menen súmelek seyili bolıp ótti.

Institut rektorı Quvondiq Qodirov hám rektorat wákilleri, sonday-aq, jası úlken professor-oqıtıwshılar bayram seyiline qatnasıp, bársheni ulıstıń ullı kúni menen qutlıqladı.
Úlken qazanlarda qaynatılıp atırǵan bayram taǵamı – súmelek bılǵap, shólkemlestiriwshilerge minnetdarshılıq bildirdi.
Usı kúni bayram seyili «Nawrız Party» keshesi menen dawam etti. Student-jaslar bayram múnásibeti menen ótkerilgen keshede jaǵımlı namalar astında oynap-kúlip, bir-birin bayram menen qutlıqlap kewilli hám mazmunlı dem aldı.
Usı kúni bayramǵa baǵıshlanıp ótkeriletuǵın úlken ilajǵa tayarlıqlar da kórildi.
Búgin instituttaǵı Nawrız seyilleri jaqsı niyetler menen baslanıp, seyilde Nawrız taǵamı bolǵan súmelek qaynatılǵan úlken shúlen qazanlar jası úlken ustazlardıń basshılıǵında ashılıp, jaqsı niyetler tilendi. Sonday-aq, institut jámááti, student-jasları hám seyil miymanları ushın bayram taǵamların tayarlawǵa kirisip, bayram ilajları baslanıp ketti.
Institut sport maydanshasında student-jaslardıń hám aymaq turǵınlarınıń qatnasıwında milliy sport oyınlarımız bolǵan láńki tebiw, arqan tartısıw, tas kóteriw, gúres, qol tiresi boyınsha jarıslar ótkerilip jeńimpazlar shólkemlestiriwshiler tárepinen xoshametlenip barıldı.
Instituttıń bas oqıw binası aldında Nawrız ulıwma xalıqlıq bayramına baǵıshlanǵan «Qádiriyatlarıń máńgi bolsın, Nawrız!» atamasındaǵı bayram seyili hám teatrlastırılǵan muzıkalı-xoreografiyalıq koncert baǵdarlaması bolıp ótti.
Ilajǵa Qaraqalpaqstan Respublikası Joqarǵı Keńesi hám Ministrler Keńesi, Joqarı bilimlendiriw, ilim hám innovaciyalar ministrliginiń wákilleri, joqarı oqıw orınlarınıń basshıları, belgili ziyalılar, ilimpazlar, professor-oqıtıwshılar, student-jaslar, sonday-aq, institut átirapındaǵı mákan puqaralar jıyınlarınıń turǵınları, keń jámiyetshilik hám ǵalaba xabar quralları wákilleri qatnastı.
Bayram ilajında institut rektorı Q.Qodirov shıǵıp sóylep, barlıq qatnasıwshılar hám miymanlardı ulıstıń ullı kúni, shıǵıs xalıqlarınıń jańalanıw hám jasarıw áyyyamı, mıń jıllardan berli ruwxıy turmısımızdıń ajıralmas bólegine aylanǵan – Nawrız bayramı menen qutlıqladı.
Mámleketimizde Prezidentimizdiń basshılıǵında joqarı bilimlendiriw tarawın sapa jaǵınan jańa basqıshqa alıp shıǵıw maqsetinde ámelge asırılıp atırǵan reformalardıń nátiyjeleri, ásirese, sońǵı jıllarda Nókis mámleketlik pedagogikalıq institutınıń materiallıq-texnikalıq bazasın jetilistiriw maqsetinde islenip atırǵan qurılıs hám dóretiwshilik jumısları, usınday imkaniyatlardan nátiyjeli paydalanıp atırǵan institut student-jaslarınıń qolǵa kirgizip atırǵan tabısları ayrıqsha atap ótildi.
Bıyılǵı oqıw jılınıń ózinde pedinstitut jasları arasınan 2 Ózbekstan Respublikası Prezidenti hám 15 ataqlı mámleketlik stipendiyalar tańlawları, sonday-aq, 13 Ájiniyaz Qosıbay ulı atındaǵı stipendiya tańlawı jeńimpazlarınıń jetisip shıqqanlıǵı, sonday-aq, sport tarawında birneshe márte jáhán, Aziya birinshilikleri, Ózbekstan chempionatlarınıń jáne ádebiyat, kórkem óner, mádeniyat tarawları boyınsha Zulfiya atındaǵı, sonday-aq, «Nihol», «Mard wǵlon» mámleketlik sıylıqlarınıń hám birneshe xalıqaralıq tańlawlardıń, pán olimpiadalarınıń jeńimpazları usı dárgayda bilim alıp atırǵanlıǵı kewillerde maqtanısh sezimlerin oyatadı.
Ótken jıl pedagogikalıq institut tariyxında úlken waqıyalarǵa, unamlı ózgerislerge tolı jıl boldı. Mámleketimiz basshısınıń tikkeley itibarı hám ǵamqorlıǵı nátiyjesinde mámleketlik byudjet esabınan 76 milliard sum qarjı ajıratılıp, zamanagóy tipte qurıp pitkerilgen 2 mıń orınlıq jańa oqıw imaratınıń paydalanıwǵa tapsırılıwı respublikamızdaǵı tuńǵısh bilim dárgayınıń 90 jıllıq torqalı toyına múnásip bayram sawǵası boldı.
Jańa oqıw imaratında zamanagóy oqıw hám lekciya auditoriyaları, eń sońǵı texnika hám texnologiyalar menen úskenelengen laboratoriyalar, IT-inkubaciya, málimleme-resurs orayları, registrator ofisi hám basqa da kóplegen imkaniyatlar jaratılǵan.
Prezidentimizdiń «Belgili qaraqalpaq shayırı hám oyshılı Ájiniyaz Qosıbay ulı tuwılǵan kúniniń 200 jıllıǵın keńnen belgilew haqqında»ǵı qararına muwapıq institutqa atı berilgen ullı shayırdıń yubileyi respublikalıq hám xalıqaralıq kólemde keń túrde belgilendi.
Ásirese, Prezidentimizdiń baslaması menen bul sáne YuNESKO sheńberinde xalıqaralıq kólemde belgilenetuǵın yubileyler qatarına kirgizilgenligi xalqımızdı sheksiz quwanıshqa bóledi.
Yubiley sheńberinde institutta Ájiniyaz muzeyi shólkemlestirilip, respublikalıq hám xalıqaralıq ilimiy-ádebiy ilajlar joqarı dárejede ótkerildi.
Teatrlastırılǵan koncert baǵdarlamasında instituttıń «Tumaris» qosıq hám ayaq-oyın xalıq ansambli, «Sıy perde», «Dugonalar», «Tarannum» hám basqa da ansamblleri, «Turan» teatr-studiyası, sonday-aq, bir topar talantlı studentler, institut pitkeriwshileri tárepinen milliy úrp-ádetler, dástúrler sáwlelengen saxnalıq kórinisler, qosıqlar, ayaq-oyınlar atqarılıp, milletler aralıq tatıwlıqtı jırlaytuǵın qaraqalpaqsha, ózbekshe, qazaqsha, túrkmenshe, qırǵızsha, russha, sonıń menen birge, klassikalıq qosıqlar atqarıldı hám jıynalǵanlarǵa bayram keypiyatın inám etti.
Ulıwmalastırıp aytqanda, hár jıldaǵıday bıyıl da Nókis mámleketlik pedagogikalıq institutı jámááti ulıstıń ullı kúni – Nawrız bayramın joqarı keypiyatta belgiledi.

Á.Jiyemuratov,
Qaraqalpaqstan xabar agentligi