Bir qatar mámleketlik uyımlarda basshılıq lawazımlarında jumıs islegen, jámiyetlik belsendi – Mels Qosnazarov ózin jazıwshılıq salasında da sınap kóriwge qarar etpekte. Bul haqqında ol óziniń Facebook betinde jazadı. Onda avtor balalarǵa arnalǵan “Marat i tayna oblachnogo mira» (Marat hám bultlı dúnya qupıyası) atamasındaǵı dáslepki kitabı rus tilinde “Bilim” baspasında jarıq kórgenin jazadı.

Bul gúrriń Marat atlı kishkene balanıń basınan ótkergenleri haqqında bolıp, planetamızdıń hesh kim bilmeytuǵın sırları bar ekenligin súwretleydi. Bultlar arasında jerimizdi hár qıylı apatlardan saqlawshı sırlı maqluqlar jasaydı. Olardıń kúshleri tawsılmaqta hám jer tábiyatın qorqınıshlı búlginshilikler kútpekte. Bunıń aldın alıw ushın adamlar planetanı qorǵawǵa kúsh salıwı tiyis ekeni súwretlengen.

Itibarlısı, kitaptı satıp alǵan adamǵa ele kitap baspası industriyasında qollanılmaǵan bonus túrleri usınıladı.

Birinshi bonus – bul kitaptıń arqa tárepindegi sanlar. Qarıydar bul sanlardı kitapta kórsetilgen elektron mánzilge jiberip óziniń atınan Moynaq rayonı aymaǵında seksewil egiliwine erise aladı, yaǵnıy oqıwshı rayondı kógallandırıwǵa úles qosa aladı. Bunıń ushın atı hám familiyası, jasaytuǵın mánzili hám telefon nomeri kórsetiliwi kerek. Seksewil tuqımı egilgennen soń oqıwshıǵa video esabat jiberiledi.

Ekinshi bonus kitaptıń ózine jaylastırılǵan, yaǵnıy kitapta seksewildiń tuqımları bar. Bul tuqımlardı qarıydar ózi jasap turǵan jerge yamasa imkaniyatı bolsa, Moynaqqa barıp egip qaytsa boladı. Kitapqa qosa seksewil egiw boyınsha tolıq jol-joba da beriledi. Usınıń menen kitap satıp alǵan puqara «Qorshaǵan ortalıqtı qorǵaw hám «jasıl» ekonomika jılı»nda iygilikli baslamalarǵa da qatnasa aladı.

M.Igilikova,

Qaraqalpaqstan xabar agentligi