Sońǵı waqıtlarda bayram koncertlerinde, telekórsetiwlerde hám sociallıq tarmaqlarda qaraqalpaq xalqınıń milliy oyınların atqarıp, xalqımızdıń názerine túsip kiyatırǵan Taqıyatas rayonı 7-sanlı Balalar muzıka hám kórkem óner mektebiniń «Shuǵla» ansambli usı jıldıń 26-27-mart kúnleri Buxara qalasında bolıp ótken jas talantlardıń «Buxora sadolari» atamasındaǵı respublikalıq tańlawında qatnasıp, sıylı birinshi orındı qolǵa kirgizdi.

Jas qosıqshı Mehriban Tilewmuratovanıń atqarıwındaǵı «Shabandoz» qosıǵına saxnanı dúr silkindirip, tamashagóydi ózine tartqanday etip shaqqanlıq penen ayaqoyındı atqarǵan ansambl aǵzaların tóreshiler birinshi orınǵa ılayıq dep bahaladı.
Ansambl bunnan aldında da elimizdegi hám xalıqaralıq tańlawlarda qatnasıp, sıylı orınlardı jeńip alıwǵa miyasar boldı. Atap aytqanda 2021-jılı noyabr ayında Qazaqstan Respublikasınıń “ART SILK WAY” tańlawında qatnasıp eń joqarı sıylıq gran-pri, sol jıldıń may ayında Ózbekstan Respublikasınıń «Sharx atir guli» atamasındaǵı tańlawda birinshi orındı iyelep, festivalda «Eń jaqsı oyın» nominaciyasına ılayıq dep tabıldı. Sonday-aq, 2021-jılı Taqıyatas rayonı hákimligi hám Jaslar isleri agentligi tárepinen ótkerilgen «Sıylıqlaw 2022» keshesinde «Xalıqaralıq tańlawlardaǵı xızmeti ushın» nominaciyası menen sıylıqlandı. Sonday-aq, ansambl aǵzaları sol jılı Surxandárya wálayatında bolıp ótken Nawrız ulıwmaxalıq bayramında óz oyınları menen qatnasıp qayttı. 2023-jılı 5-6-noyabrde Qazaqstan Respublikasınıń «Baxıtlı eldiń áwladı» atamasındaǵı tańlawda eń úlken sıyıq gran -pridi utıp aldı hám sol sapar dawamında jáne bir «Musiqa hayoti» tańlawında gran pri hám birinshi orındı jeńip alıwǵa miyasar bolıdı. Ansambl sonday-aq, elimizde ótkerilip atırǵan bayram koncertlerinde de belsene qatnasıp kelmekte. 2023-jıldıń dekabr ayında Tashkent qalasındaǵı Xalıqlar doslıǵı sarayında bolıp ótken QVZ tańlawınıń filialında belsene qatnasıp, ózleriniń ayaq oyınların tamashagóylerge usınıp, tamashagóylerdiń alǵısına miyasar bolıp qayttı. Jáne de 2023-jıl may ayında Ózbekstan Respublikasınıń «Sharq atir guli» atamasındaǵı tańlawda birinshi orındı qolǵa kirgizgen bolsa, 2024-jıldıń noyabr ayında Tashkent qalasında ótkerilgen «Open Asia» xalıqaralıq tańlawında birinshi orındı iyelep, Ispaniya mámleketine jollamanı qolǵa kirgizedi.
«Shuǵla» ansambli 2019-jılı dúzilgen bolıp, onı talantlı ayaq oyınshı Ájiniyaz Ashirov shólkemlestirip hám basshılıq etip kelmekte.
–Ansambldi dúzgen waqıtta 12 er hám 12 qız balalar menen baslaǵan bolsaq, házirgi waqıtta olardıń qatarı keńeyip, ayaq oyınǵa qızıǵıwshı balalar sanı artpaqta. Ata-analar balalarnıń bos waqıtların mazmunlı ótkeriwi hám bos júrmewi ushın anasmblimizge alıp keledi. Álbette, olar arsınan ayaq oyınǵa qızıǵıwshı hám talantlı balalardı tańlap alamız. Ózbek, qaraqalpaq, túrkmen, qazaq hám basqa da millet wákilleriniń ayaq oyınları repertuarımızdan orın alǵan. Aldaǵı waqıtlarda ele de tartımlı ayaq oyınlardı saxnalastırıp, xalqımızdıń názerine usınıwdı rejelestirmektemiz,-deydi Ájiniyaz Ashirov.

Gúlnara Turdıshova, Qaraqalpaqstan xabar agentligi