Samarqand wálayatında Ózbekstan kóleminde kózi ázzi hám shala kóriwshi oqıwshılar arasında tiykarǵı pánler olimpiadasınıń Respublikalıq basqıshı bolıp ótti.

Olimpiadaǵa Respublikalıq mektep-internatlardıń 11-klass oqıwshıları matematika, ózbek tili hám ádebiyatı, rus tili hám ádebiyatı hám tariyx pánlerinen ózleriniń bilimin sınnan ótkerip, nátiyjede múnásip jeńimpazlar anıqlandi.
Bul olimpiadaǵa Nókis qalasındaǵı «Nurlı mákan» mektep-internatınıń oqıwshıları da belsene qatnastı. Sonıń ishinde, 11-klass oqıwshısıları Farida Ramanova hám Sultan Turambetovlar rus tili hám ádebiyatı páninen ekinshi hám úshinshi orınlardı, matematika páninen Shamurat Kewlimjaev úshinshi orındı iyelep, internat tariyxında burın bolmaǵan jańa tabıstı qolǵa kirgizdi.
-Mektebimiz oqıwshılarınıń qolǵa kirgizgen bul jetiskenlikleri álbette, pútkil mektep-internattıń, qalaberdi, jeńimpazlarımızdıń talapshań, izleniwsheń hám nátiyjege erisiw jolında tınıp-tınshımaytuǵın bilimli ustazlarınıń tınımsız miyneti hám kópten kútken jetiskenligi bolıp esaplanadı-deydi mektep-internat direktorı, 1-«Jolshılar» saylaw okruginen Xalıq deputatlar Nókis qalalıq Keńesi deputatı Aydarbek Aymuratov.-Bunday jetiskenliklerdiń izi dawamlı bolıwın shın kewilden tilep, barlıq ustazlarǵa óz minnetdarshılıǵımdı bildiremen.
Maǵlıwmat ushın aytatuǵın bolsaq, jeńimpaz oqıwshılarımızdı rus tili hám ádebiyatı páni muǵallimleri Elizaveta Qudiyarova, Zernegul Shataeva hám matematika páni muǵallimi Abat Dosjanovlar tayarladı.

Gúlnara Mamutova,
Nókis qalasındaǵı «Nurlı mákan» mektep-internatınıń «Kitapqumarlar» dógeregi basshısı.
Qaraqalpaqstan xabar agentligi