Prezidentimizdiń 2024-jıl 24-maydaǵı «Hákimshilik reformalar sheńberinde ádillik uyımları hám mákemeleriniń juwapkershiligin jáne de arttırıw hám ıqsham basqarıw sistemasın qáliplestiriw haqqında»ǵı pármanınıń talaplarınan kelip shıǵıp, ádillik bólimleri tárepinen máhállelerde úyme-úy júriw arqalı xalıqtıń arasında huqıqıy mashqalanı anıqlaw, tallaw hám olardı saplastırıw menen baylanıslı jumıslar nátiyjeli shólkemlestirilmekte.

– Atap aytqanda, «Aspantay» awıl puqaralar jıyınında ótkerilgen xatlaw nátiyjesinde usı aymaqta jasap kiyatırǵan Madeshova Tazegul Jaxievnanıń 1993-jıldan berli Ózbekstan Respublikası puqaralıǵın tastıyıqlawshı hújjeti joq ekenligi menen baylanıslı huqıqıy mashqalası tiyisli tártipte dizimge alınıp, úyreniw jumısları alıp barıldı,-deydi Qaraqalpaqstan Respublikası Bozataw rayonı ádillik bóliminiń baslıǵı Kazbek Palwaniyazov. – Huqıqıy mashqalanı úyreniw dawamında puqara T.Madeshova 1969-jıl 27-avgust kúni Túrkmenstan Respublikası Tashawız wálayatı Góne Úrgensh rayonında tuwılǵanlıǵı, shańaraq qurǵanlıǵı sebepli 1993-jıldan berli «Aspantay» awıl puqaralar jıyınında jasap kiyatırǵanı, 1997-jılı usı máhállede jasawshı puqara Koshekeev Shapbay Jumabaevich penen nızamlı nekeden ótkenligi, 2 perzentiniń bar ekenligi anıqlandı.
Rayonnıń ádillik bólimi tárepinen puqara T.Madeshovanıń Ózbekstan Respublikasında jasaǵanı faktin tastıyıqlaw boyınsha sudqa arza kirgizip, arza sud tárepinen qanaatlandırıldı. Nátiyjede, puqara T.Madeshovaǵa Ózbekstan Respublikası puqarasınıń ID-kartası berilip, huqıqıy mashqala unamlı sheshildi.

Qaraqalpaqstan xabar agentligi