Shımbay rayon hákimliginiń májilisler zalında Ózbekstan Respublikası Prezidentiniń 2025-jıl 27-yanvar kúngi «Qaraqalpaqstan Respublikasında isbilermenlikti jáne de qollap-quwatlaw hám xalıqtıń abadanlıǵın támiyinlew ushın jańa imkaniyatlar jaratıw boyınsha qosımsha ilajlar haqqında» ǵı pármanınıń áhmiyetin keńnen túsindiriw maqsetinde, seminar shólkemlestirildi.

Seminarǵa rayondaǵı jeke isbilermenler, Qaraqalpaqstan Respublikası Joqarǵı Keńesi Apparatı investiciyalar, kishi biznes hám isbilermenlikti qollap-quwatlaw sektorı baslıǵı A. Shamurtatov hám Ózbekstan Sawda-sanaat palatası Qaraqalpaqstan Respublikası basqarması baslıǵı K. Artıkovlar qatnastı.
Ilajdı rayon hákimi A. Tajetdinov basqarıp bardı.
Seminarda shıǵıp sóylewshiler tárepinen mámleketlik baǵdarlama sheńberinde isbilermenlikti bunnan bılay da qollap-quwatlaw hám investorlar ushın qolaylı imkaniyatlar jaratıw, sanaat tarmaqları, awıl xojalıǵı, turizm tarawlarınıń potencialınan nátiyjeli paydalanıw, sociallıq hám óndirislik infrastrukturanı rawajlandırıw, sol tiykarda xalıqtıń bántligin támiyinlew boyınsha túsinikler berildi.
Ótkerilgen ilaj dawamında qatnasıwshılar tárepinen qánigelerge sorawlar berilip, olarǵa juwaplar aldı.

Qaraqalpaqstan xabar agentligi