Xabarıńız bar, Bajıxana komitetiniń baslıǵı bir waqıttıń ózinde Ózbekstan Respublikası Jeńil atletika Federaciyasınıń baslıǵı lawazımına da tayınlanǵan. Aymaqlıq bajıxana basqarmalarınıń basshıları da Federaciyanıń aymaqlıq bólimleri baslıqları sıpatında taraw jumısların muwapıqlastırıp baradı hám ámeliy járdem kórsetip turadı.

Nókis qalasında jeńil atletika sport túrleri boyınsha “Úmit nálsheleri” sport jarıslarınıń respublika basqıshı bolıp ótip, onda Qaraqalpaqstan Respublikası Bajıxana basqarmasınıń juwapker wákilleri qatnasıp, rayon hám qala basqıshlarında jeńimpazlıqtı qolǵa kirgizgen mektep oqıwshıların úshinshi Qaraqalpaqstan Respublikası basqıshında sınaqtan ótkerdi.
Jeńil atletika sport túrlerinen túrli aralıqlarǵa juwırıw, estafeta, uzınlıqqa sekiriw hám yadro ılaqtırıw boyınsha óz-ara bellesken jaslar ishinen respublika jeńimpazları anıqlanıp, Ózbekstan Respublikası kólemindegi sport jarıslarına jollamanı qolǵa kirgizdi.
Hár úsh jılda bir márte ótkeriletuǵın usı sport jarısları jaslar arasında salamat turmıs tárizin úgit násiyatlaw, olardıń ǵalabalıq sport túrlerine qızıǵıwshılıǵın arttırıw menen bir qatarda, mektep oqıwshıları arasınan saylandı komanda quramına qábiletli hám múnásip talabanlardı saylap alıw imkaniyatın da beredi.

Qaraqalpaqstan xabar agentligi