Qaraqalpaqstan Respublikası Bajıxana basqarması tárepinen Biznes ombudsman apparatınıń juwapker wákiliniń qatnasıwında aymaqlarda jumıs alıp barıp atırǵan isbilermenlik subektleri hám arnawlı ekonomikalıq zona qatnasıwshıları ushın seminar-trening shólkemlestirildi.

Onda bajıxana tarawında sırtqı ekonomikalıq jumıs baǵdarında jaratılıp atırǵan sharayatlar menen bir qatarda, endi, bajıxana uyımı tárepinen isbilermenlik subektleriniń jumısında ótkeriletuǵın “Kameral” hám “Sayyor” bajıxana auditleri “Birden-bir mámleketlik qadaǵalaw” málimleme sistemasında dizimnen ótkeriliwi arqalı Biznes-ombudsmandı xabardar etken halda ámelge asırılıwı tártip-qaǵıydaları boyınsha maǵlıwmatlar berildi.
Hár bir kárxanaǵa ótkeriletuǵın auditlerdiń nızamlı hám ádil bolıwınıń shártleri, ótkeriliw tártipleri hám múddetleri óz-ara sáwbetlesiw túrinde hár bir sırtqı ekonomikalıq jumıs qatnasıwshılarına jetkerildi.
Ushırasıw dawamında isbilermenlik subektlerine Ózbekstan Respublikası Prezidentiniń 2025-jıl 6-marttaǵı “Arnawlı ekonomikalıq hám sanaat zonaları jumısınıń nátiyjeliligin arttırıw boyınsha qosımsha ilajlar haqqında”ǵı pármanı menen arnawlı ekonomikalıq zona qatnasıwshıları ushın tovarlardı qayta islew processlerinde jaratılıp atırǵan qolaylıqlar, óndiris processlerin “bajıxana aymaǵında qayta islew” rejiminen paydalanǵan halda shólkemlestiriwdiń abzallıqları ámeliy mısallar menen túsindirildi.
Maǵlıwmat ushın, Qaraqalpaqstan Respublikasında jıl basınan jámi 5 kárxana tárepinen bahası 1 mln. AQSh dollarına teń tovarlar “bajıxana aymaǵında qayta islew” rejimine rásmiylestirilip, sonnan bahası 470 mıń AQSh dollarına teń tovarlar qayta islengen halda eksport etiliwi támiyinlengen.
Ilaj juwmaǵında SEJ qatnasıwshıları temaǵa baylanıslı ózlerin qızıqtırǵan sorawlarǵa tarawlıq struktura basshıları hám biznes ombudsman wákilinen tiyisli maǵlıwmatlar aldı.

Qaraqalpaqstan xabar agentligi.