Xalıqtıń Kadastr tarawındaǵı múrájatlerin kórip shıǵıw maqsetinde Mámleketlik kadastrlar palatası baslıǵınıń birinshi orınbasarı Nozimjon Inamovtıń basshılıǵında Nókis qalasında kóshpeli qabıllaw ótkerildi.

Qabıllawda taraw boyınsha fizikalıq hám yuridikalıq táreplerdiń múrájatleri tıńlanıp, olardıń mashqalaların nızamlı sheshiwge háreket etildi.
– Búgingi kóshpeli qabıllawda meniń de mashqalam kórip shıǵıldı. Yaǵnıy, Taqıyatas rayonında 3,2 gektarlıq jer maydanında jaylasqan ıssıxanamız bar edi. Sol jerge awıl xojalıǵına arnalǵan jer sıpatında emes, al tolıq stavkada salıq tólep atır edik. Kadastr basshıları múrájatımdı tıńlap, jerdi awıl xojalıǵı jeri sıpatında esaptan ótkeretuǵın boldı. Usınday járdemi ushın taraw basshılarınan minnetdarmız,-deydi qabıllawǵa kelgen puqaralardıń biri Vaxid Qurbaniyazov.
Qabıllawda jámi 25 múrájat kelip túsken bolsa, sonnan 14 múrájat sol orınnıń ózinde unamlı sheshildi. Qalǵan múrájatlerdi úyrenip shıǵıw ushın qánigelerge tapsırmalar berilip, huqıqıy tárepleri túsindirildi.

Á.Jiyemuratov,
Qaraqalpaqstan xabar agentligi.