«Adolat» SDP tárepinen jergilikli Keńeslerdegi partiya deputatları ushın «Jergilikli keńesler hám deputatlardıń jumısın nátiyjeli shólkemlestiriw, olardıń Oliy Majlis Nızamshılıq palatasınıń deputatları menen birge islesiwin bekkemlew» temasında seminar-trening shólkemlestirildi.

Ótken jılǵı saylawda xalıq deputatları jergilikli Keńeslerine «Adolat» social-demokratiyalıq partiyasınan saylanǵan deputatlar partiyanıń saylaw aldı baǵdarlamasında belgilengen maqsetlerdi júzege shıǵarıw, xalıqtıń máplerin qorǵaw hám orınlardaǵı sociallıq-ekonomikalıq máselelerdi sheshiwde belsene qatnasıwı zárúr. Bul processte jergilikli Keńeslerde deputatlıq jumısın nátiyjeli shólkemlestiriw, nızam dóretiwshiligi hám qadaǵalaw-tallaw jumısın kúsheytiw, deputatlar arasında óz-ara birge islesiwdi bekkemlew úlken áhmiyetke iye.
Usı maqsette shólkemlestirilgen seminarda deputatlardıń wákilligi hám juwapkershiligi, olardıń nızam dóretiwshiligi procesine qatnasıwı, jergilikli dárejedegi mashqalalardı parlament minberine alıp shıǵıw mexanizmleri hám nátiyjeli birge islesiw jolları boyınsha hár tárepleme maǵlıwmatlar berildi.
– Partiyamızdan kórsetilgen talabanlardan Ózbekstan Respublikası Oliy Majlisi Nızamshılıq palatasına 21 talaban deputat etip saylanǵan bolsa, Qaraqalpaqstan Respublikası Joqarǵı Keńesi, xalıq deputatları wálayatlar hám Tashkent qalalıq Keńeslerine 103, xalıq deputatları rayonlıq hám qalalıq Keńeslerge bolsa 752ni quradı. Talabanlar kórsetiwde tikkeley gender teńlikke ayrıqsha itibar qaratılǵan. Jáne sonı da atap ótiw kerek, wálayatlıq Keńeslerde 14, rayonlıq hám qalalıq Keńeslerinde 188 deputatlıq toparları dúziliwine erisildi. Bul bolsa, óz gezeginde, «Adolat» SDP tek ǵana Oliy Majlistiń Nızamshılıq palatasında emes, al jergilikli Keńeslerde de úlken kúshke iye ekenin kórsetedi. Biz bul kúshtiń álbette, xalıqtıń turmıs dárejesin bunnan bılay da arttırıw, olardı qıynap kiyatırǵan mashqalalardı saplastırıp, unamlı nátiyjege erisiw jolında xızmet etetuǵın maqset etkenbiz, – dedi partiya basshısı Robaxon Mahmudova.

Seminarda bayanatshılar tárepinen deputatlardıń aymaqlardaǵı jumısın bunnan bılay da janlandırıw, xalıq máplerin nátiyjeli qorǵaw ushın zárúr mexanizmler, sonday-aq, jergilikli hám oraylıq mámleketlik uyımlar menen birge islesiwdi kúsheytiw máseleleri, deputattıń statusı, huqıqları menen minnetlemeleri haqqında jáne olardıń ǵalaba xabar qurallarında shıǵıwın keńeytiw, deputatlıq jumıstıń ashıq aydınlıǵın támiyinlew baǵdarında keń maǵlıwmatlar berildi.
Óz gezeginde, jergilikli Keńeslerdegi deputatlardıń pikir-usınısları tıńlandı.

Muhtarama KOMILOVA,
ÓzAnıń xabarshısı